Ta notando un caida drastico den envelop y aumento den pakinan

ORANJESTAD, Aruba – 16 di Januari 2017: “Nos ta masha contento y gradici na e cooperacion adicional cu Cuerpo di Aduana ta brindando nos di Post Aruba. Mi ta convenci cu e extra sosten aki lo traduci awor den mas eficiencia y mas rapidez den procesamento di pakinan na clientanan”, asina Guillermo Raymond, director di Post Aruba N.V. a duna di conoce. E ta referi na e cantidad grandi di pakinan cu a yega Post Aruba e ultimo simannan y e mannan limita cu nan tabata conta cune di autoridadnan competente pa por procesa, saca e pakinan y entrega na clientenan.

“E volumen di carta ta bahando drasticamente mientras cu e cantidad di pakinan ta aumentando mas di locual nos a spera of anticipa. Specialmente den fin di aña nos a experencia un crecemento enorme”, asina Guillermo Raymond a expresa cu un satisfaccion riba su cara. Di un banda esey ta bon noticia pasobra e ta nifica cu nos nivel di servicio a bay ta mehorando di tal forma cu tur dia e confiansa di comunidad ta aumenta y mas hende ta scoge pa uza nos servicionan di entrega.

Pero, durante dianan di fiesta tabatin algun dia liber y nos a confronta retonan pa cu Douane cu tabatin tambe algun dia di accion cu nan sindicato. E dianan ey, aunke no tabata hopi, a pone cu nos a crea un atraso den procesamento di e pakinan y pa por entrega na clientenan.

“Mi ta masha orguyoso di bisa cu nos a papia cu Cuerpo di Aduana y nan a contesta nos mesora cu 3 Duanero cu awor ta trahando na Post Aruba, pues 2 extra. E intencion ta pa e sosten adicional aki yuda baha e atraso mesora y pa yuda nos den ofrece clientenan un miho servicio. Nos ta hopi gradici na Aduana y mi ta spera di por sigui conta cu nan sosten di semper, pasobra sin nan, nos no por haci nos trabou eficientemente”, asina Guillermo Raymond a splica.

Ta pidi clientenan poco mas pasenshi pasobra tur paki lo sali den e siguiente dianan pa asina yega nan destinacion mas pronto posibel. Di otro banda, Post Aruba lo sigui na mesa cu directiva di Cuerpo di Aduana pasobra tur indicacion ta mustra cu e “trend” di pakinan aki lo sigui halto compara cu e caida drastico den cantidad di envelopnan. “Nos ta cla pa e transicion. Nos trabou ta di entrega, sea ta carta of paki. E unico diferencia ta cu carta nos mes ta sali bay parti mesora ora nos hay’e, pero paki nos mester un Duana pa check prome, habri’e si mester, controla si a paga impuesto, etc., pues nos ta depende di otro departamentonan. Pero nos ta traha hunto pa por brinda un bon servicio na cliente”, asina Guillermo Raymond a termina bisando.

A funda e compania priva Post Aruba N.V. na aña 2005. Su oficina principal ta situa na J.E. Irausquin Plein # 9 na Oranjestad y tin 3 oficina adicional na Santa Cruz, Noord y San Nicolas. Ey ta ofrece tur tipo di servicio, for di manda un envelop, te na carga pisa. Post Aruba N.V. ta conta cu 111 empleado, cu diariamente ta yega na 42 mil adres situa tur rond di nos isla. Mas cu djis un servicio, e empleadonan atento ta percura pa tanto comunidad como sector comercial por comunica cu otro.

Pa mas informacion riba servicionan di Post Aruba N.V., bishita e website www.postaruba.com of check nan paginanan riba Facebook, cu ta E-Post Aruba y Aruba Stamps.