WILLEMSTAD — Durante e enkuentro mensual di direktivanan di skol riba 11 di yanüari ku a pasa, e tim di investigashon di e Programa di Akshon Desaroyo di Hubentut a presentá diferente tópiko relashoná ku Desaroyo di Hubentut, e.o e Factsheet schooldropouts. E tim di investigashon di e Programa di Akshon Desaroyo di Hubentut a traha huntu ku Centraal Bureau voor Statistiek (CBS) pa kolektá tur datos den e Factsheet Schooldropouts. E tim di investigashon tambe a duna un update di e Monitòr di Hubentut ku a ser hasí na 19 skol rònt Kòrsou. Un raportahe di datosnan demográfiko lo ser presentá na kada skol individual pronto.
Un punto sentral den e Programa di Akshon 2015-2020 ta pa traha na un manerá fundá a base di datos. Datos i konosementu riba e tópiko di desaroyo di hubentut ta ser kolektá i analisá dor di e tim di investigashon i presentá i deliberá ku diferente organisashon den vèlt i otro stakeholders. Den kuadro di esei a organisá un seshon ku direktivanan di skol.
E konsepto di ‘dropout’ no ta unu deskonosí na Kòrsou, pero dikon i ken ta parti di e grupo aki, kuantu hóben ta forma parti no ta semper bon kla. E motibu pa esaki ta ku ta usa diferente definishon, i pues ta yega tambe na diferente kantidat i porsentahe. Pa duna mas informashon di e problematiká aki e tim di investigashon a hasi e informashon aksesibel i buta tur datos riba un rei. Banda di e entregá di e Factsheet schooldropouts e tim di Programa di Akshon Desaroyo di Hubentut a informá e direktivanan di skol di e otro publikashonnan, manera e.o factsheets di desempleo bou di hóbennan i hóbennan ku limitashon intelektual leve. Tur hende por download e factsheets aki riba e banko di konosementu digital di Desaroyo di Hubentut.
Durante e enkuentro ku direktivanan di skol e progreso di e Monitòr di Hubentut tambe a bini na remarke. A implementá e Monitòr di Hubentut na diferente skol di ‘Dienst Openbare Scholen (DOS)’, ‘Rooms Katholiek Centraal Schoolbestuur (RKCS)’ i ‘Vereniging voor Protestant Christelijk Onderwijs op Curaçao (VPCO)’. E Mònitor di Hubentut ta indiká kon ta pará ku desaroyo di mucha i hóben na Kòrsou i unda tin mester di mas atenshon, por ehèmpel riba tereno di aktividat den tempu liber i e manera ku mucha i hóbennan ta eksperenshá sosten i kuido. E tim di investigashon di e Programa di Akshon Desaroyo di Hubentut a validá e Monitòr kaba i ta trahando riba e resultadonan pa presentá esei pronto.
Por haña e factsheet Schooldropouts i otro publikashon riba: http://www.desaroyodihubentut.cw/cw/banko-di-konosementu/