….Djasabra 2 di novèmber Curacao Media Organization a terminá otro kurso, e biaha aki di Papiamentu básiko ku tabatin komo entrenadó Jenny Fraai. Un total di 24 miembro di prensa a partisipá na e kurso, hasiendo esaki unu eksitoso. E kurso di papiamentu básiko a kuminsá dia 19 di òktober ku intenshon pa dura 2 djasabra. Pero e tabata asina interesante i mirando kuantu e nesesidat tabata serka miembronan di prensa pa siña mas, a bai ku e kurso 3 djasabra. Dia 2 di novèmber tabata e último dia di kurso ku a terminá ku entrega di sertifikado di partisipashon. Manera nos a bisa, tabata un kurso básiko di papiamentu kaminda a pasa riba e ortografia di papiamentu, e puntonan mas esensial i importante pa esun ku ke papia i skibi su idioma manera mester ta, por siña di dje. Manera e lema ta bisa “Kiko ta kitabu di skibi bo lenga bon? Ku esaki na mente i teniendo kuenta e trabou importante di prensa den un komunidat, CMO a organisá e kurso aki. I mirando e interes grandi ku tin lo bai ku un kontinuashon otro aña. Ta pidi miembronan di prensa pa keda pendiente pa e kontinuashon. Entrenadó tabata Jenny Fraai. CMO no tin palabra pa gradesí señora Fraai pa e kooperashon ku el a duna nos organisashon, poniendo su mes disponibel pa e kurso aki  kompletamente grátis. I el a bai asta mas leu di bai un di tres djasabra ora el a mira e nesesidat den e medionan di prensa pa siña mas. CMO ta gradesí Jenny Fraai pa e kooperashon aki. Pa e aña aki nos lo no tin mas kurso. Nos ta kontinuá yanüari ku mas kurso interesante ku nos lo informá di dje pronto. Danki na tur nos sostenedonan ku a sa di hasi e kursonan posibel i ku ta sigui sostené CMO pa asina nos por realisá nos meta di kapasitá i rekapasitá miembronan di prensa. Na e kurso di papiamentu tabatin partisipante di Vigilante, EXTRA, CBA, Tele Curacao, Fiesta FM, Radio Mass, Ultimo Notisia, ESO Event, Radio Krioyo. Un danki na nan tur pa a sigui e 3 djasabranan di forma intensivo na e kurso básiko di papiamentu.