Hunto Nos Ta Yuda…

ORANJESTAD, Aruba — December 10 2016, Manera tur hende sa riba dia 20 di november, Aruba a pasa den un awacero torencial cu a causa basta daño rond e isla. Mas di 70 mm di awa a cay entre cuater pa cinco ora. Esaki a causa inundacionnan na varios parti di nos comunidad. Concecuencia di esaki ta cu varios famia mester a bandona nan cas pa motibo di e dañonan sosteni cu a haci imposibel pa nan keda.

Rode Kruis Aruba a responde mes ora y a bay na diferente sitionan rond di e isla pa accesora e situacion, hunto cu departamentonan gubernamental y otro instancianan. A bin resulta cu mas di 100 famia a keda afecta. For di e investigacion inicial aki a dicidi di organisa e programa “Hunto Nos Ta Yuda,” pa asina por logra e meta pa yuda esnan cu a keda mas afecta. Un cuenta di banco, unda comunidad completo por haci nan donacion, a keda habri y ta wordo maneha pa Rode Kruis Aruba.

E fondonan acumula lo bay pa adkeri materialnan necesario, entre otro, cama, kashi, mesa, stul, stoof, firgidair, etc. “Esakinan por ta materialnan uza caba tambe,” Director di Rode Kruis Aruba, Michel La Haye ta bisa. Mirando tur e acontecimentonan aki, AHATA a contesta e yamada di yudansa di Rode Kruis Aruba entregando un check di Awg. 10.000,= Riba potret por mira momento cu sra. Vanessa Rasmussen di AHATA ta entrega e check na Director di Rode Kruis Aruba, sr. Michel La Haye, den presencia di sr. Jurgen van Schaijk.

Durante e acto di entrega Michel La Haye a haci un yamada na henter e comunidad pa contribui na e fondonan di “Hunto Nos Ta Yuda.” “E no ta porta cuanto, suma grandi of chikito. Cada un contribucion ta yuda nos pa yuda esnan cu a keda afecta pa e awacero torencial. Esaki por wordo haci door di deposita e placa via banco riba cuenta: Aruba Bank, Account 038.401.0390, Rode Kruis Aruba – Hunto Nos Ta Yuda,” e ta agrega.