WILLEMSTAD – Promé di novèmber 2013 – Pabien! Nos tin 100.000 fanátiko riba Facebook! Míles di blas blou a bai laira na Berlin, Miami i Shanghai. Di e manera spesial aki Curaçao Tourist Board (CTB) a gradisí e komunidat di su paginá di Facebook pa e di 100.000 ‘like’ risibí. Komo parti di un proyekto di video internashonal amigu i fanatikonan di nos isla a yena shelu ku míles di blas den koló Curaçao Blue pa asina duna honor na Kòrsou. Na momentu di selebrá e di 100.000 ‘like’ a publiká e video aki komo un gradisimentu grandi riba e Facebook Fanpage di CTB. Mas ku klaro tin míles di manera pa selebrá un echo asin’aki, pero pa e tantísimo fanatikonan aktivo i entusiasmá ku Kòrsou ta algu realmente úniko, un video produsí spesialmente pa tur e fanatikonan  ku henter mundu komo lokashon di produkshon di e video.  Komo parti di e proyekto di video internashonal CTB a manda míles di blas koló blou imprenta ku e bandera  di Kòrsou pa amigu, amiga i fanatikonan na Merka, Hulanda, Venezuela, Brazil, Alemania i vários pais mas. Di e forma aki durante algun dia CTB a kolekshoná tur e pelíkulanan kòrtiku ku deseonan di pabien i blasnan di Kòrsou ku a dòrna shelu di entre otro; Brandenburg Gate, Bund of Shanghai i Miami Beach. For di e pelíkulanan kòrtiku aki a produsí un video kolektivo kual a wòrdu publiká pa e aniversario di e di 100.000 ‘like’ komo un grandioso ‘Danki’ riba Facebook. E manera emoshonal i eksepshonal aki di yama danki sigur lo sorprendé no únikamente e fanatikonan riba Facebook pero tambe lo representá e manera alegre di nos hendenan i e karakterístika multi-kultural ku Kòrsou ta para pe. 100.000 ‘like’ ta un logro hopi grandi ora bo kompará nos página ku di e otro islanan den Karibe.  Aruba tin 74,473 ‘like’, St. Maarten tin 12,877 ‘like’, Barbados tin 141,655 ‘like’, Trinidad and Tobago tin 11,327 ‘like’ i Jamaica tin 182,926 ‘like’ pues sigur nos isla ta un di e grandi nan den Karibe pa loke ta trata ‘Social Media’ –  (‘like’-nan te ku 31 di òktober 2013)