Willemstad – 31 di òktober 2013 – E kampaña promoshonal ku Ofisina di Turismo di Kòrsou (CTB) a lansa den koperashon ku Copa Airlines ta kanando positivamente. Copa Airlines a kuminsá su operashonnan na Kòrsou na yüni di aña 2012 despues di lansamentu di un kampaña promoshonal pa introdusí e destinashon. E kampaña ku a keda lansa na luna di sèptèmber último, tin komo meta pa sigui promové Kòrsou komo destinashon turístiko i komo un alternativa turístiko nobo bou di e mas di 5 mion biaheronan ku kada aña ta skohe pa biaha ku e hub di ‘Las Américas’ na Tocumen. E ophetivonan di merkadeo ku a keda akordá entre CTB i Copa Airlines ta, pa sigui promové e marka Kòrsou internashonalmente komo un destinashon turístiko, sigui promové Copa i Kòrsou den siudatnan kaminda Copa a oumentá e kapasidat di buelo òf den destinashonnan nobo di Copa di manera ku por oumentá e okupashon di buelonan. E kampaña ta enfoká riba 3 pilar stratégiko: playa, kompra i bida nokturno. Esakinan ta puntonan importante pa biaheronan di Sur Amérika ora nan ta evaluá eskoho den destinashon pa pasa vakashon. E kampaña aktual ta kore te ku luna di novèmber. E kampaña ta konsentrá den e merkadonan di Brasil, Colombia i Panama. Pa kada merkado a skohe e komponentenan ku tin mas impakto pa introdusí e destinashon. Na Panama a skohe pa korant, billboard i diferente kanal di televishon de kabel konosí, manera CNN na spañó, TNT, Discovery i ESPN. Na Brasil a skohe pa televishon, billboard i tambe a hasi uso di medionan sosial i promoshon via Internèt. Den kaso di Colombia a konsentrá mas den korantnan lokal. Un di e komponentenan mas importante ta e akshon ku ta wòrdu hasi via di Copa su “in-house” Tour Operator kual ta Copa Vacations. Esaki ta enserá ku atraves di medionan tradishonal manera entre otro flyers, korant i tambe via di medionan sosial, ta promoviendo paketenan spesial ku a keda krea huntu ku hotèlnan ku a partisipá den e akshon spesial aki. Bentaha di e kampaña aki ta ku e ta konsentrá riba stimulá yegada di mas turista, kual por keda tradusí den oumento di okupashon di buelonan di Copa Airlines, oumento di okupashon di kambernan di hotèl i mas demanda pa e destinashon Kòrsou.