Cliente cu scoge pa haya recibo via email lo ricibi tas reusable pa haci compras

Oranjestad, 23 di november, 2016– Aruba Bank a lansa su prome  iniciativa “green”  na sucursalnan cu tin servicio di cahera, Camacuri, Hato, y San Nicolas. E iniciativa ta forma parti di esfuersonan di e compania den su totalidad cu ta inclui ahustacionnan den tur area pa sostene nos medio ambiente.

E “ paperless-receipt-option” ta un opcion nobo cu tur cliente lo tin na momento cu nan ta haci uzo di servicio di cahera na sucursalnan. Ariba peticion di e cliente e cahera por manda e recibo via e-mail pa e cliente y no print e recibo. Dor di uza menos papel, e cliente ta yuda Aruba Bank den su esfuerso pa contribui na sostenibilidad di e planeta pa futuro generacionnan. Durante di 2016, Parlamento di Aruba a vota pa implementa e prohibicion di uzo di saco di plastic ariba nos isla. Den cuadro di esaki y pa encurasha conscientisacion di nos medio ambiente y pa facilita nos clientenan pa adapta na esfuersonan na nos pais, Aruba Bank lo duna tur cliente cu pidi pa ricibi nan recibo via mail durante luna di November y December un tas reusable pa haci compras den preparacion pa  introduccion di e ley nobo otro aña. Aruba Bank su  “Green Movement” logo ta ilustra ariba tur tas cu lo wordo parti durante di e temporada.  Cu nan Green Movement Initiative lo sostene esfuersonan nacional pa preserva mama tera y e ley cu lo bin na vigor 1 di januari 2017. Aruba Bank ta encurasha tur su clientenan pa uni na nan esfuerso. E uzo di un ‘Green Bag’ ta scapa nos isla  di miles di saco di plastic cu tin rond y ta yuda preveni e destruccion di nos bida marino.