ORANJESTAD, Aruba – 22 di November 2016: Diabierna McDonald’s a celebra McHappy cu comunidad di Aruba, cu un dia di benta di BigMac dedica completamenta na Centro Man Na Obra. Ta celebra McHappy Day rond mundo. Na Aruba ya pa varios aña caba tur hende sa cu ora e “mannan geel”  ta cuminsa aparece durante benta na McDonald’s cu e dia festivo aki ta na caminda. E evento anual a resulta den un exito inmenso un biaha mas y McDonald’s ta gradici comunidad pa nan sosten grandi y entusiasmo pa contribui na Centro Man Na Obra.

McHappy Day ta mas cu “mannan geel”. “Helping Hands” ta un simbolo di hermandad y comunitarismo; y McHappy day ta un dia dedica na haci mas feliz e bida di sernan humano den e comunidadnan unda McDonald’s tin restaurant. Esaki McDonald’s ta haci dor di esfuersonan intensivo di conscientisacion pa un organisacion caritativo dedica na un of mas grupo vulnerabel y/of obra comunitario valioso, combina cu un donacion di henter e benta di ful un dia di BigMac na e organisacion scogi.

McDonald’s ta haci hopi promocion pa e dia aki y ta provee tambe un programa pa companianan por cumpra BigMac den prebenta pa medio di couponnan special.

Na Aruba a dedica McHappy Day 2016 na Centro Man Na Obra, cu ta yuda promove entrenamento di trabao y integracion den comunidad di personanan special. E edad minimo pa un persona cuminsa ricibi guia y trabao na Centro Man Na Obra ta 16 aña y no tin un edad maximo.

Ta prepara clientenan na e centro pa traha den mercado laboral; nan por haci tareanan facil den un ambiente protegi. E participantenan ta traha den grupo den carpinteria, trahamento di obhetonan di klei, decoracion di obhetonan di klei, trahamento di bela, labamento di auto, labamento di boter, hardineria y strica paña. Banda di e entrenamento tecnico, ta dedica atencion tambe na e desaroyo di nan habilidadnan social.

Operations Supervisor pa McDonald’s Aruba, Sulina Vrolijk a expresa, “Masha, masha danki Aruba! McHappy Day ta e campaña y recaudacion di fondo mas grandi di McDonald’s y e ta permiti nos duna bek na e comunidadnan cu nos ta sirbi.” “Danki na boso contribucion cu compra di un “Helping Hand” y/of BigMac Centro Man Na Obra a ricibi un tremendo y bunita donacion. E campaña ta yena nos cu entusiasmo tur aña, como cu McHappy Day ta haci nos orguyoso no solamente pasobra nos clientenan ta compromete nan mes pa sostene un necesidad enorme, pero tambe nos compania den su totalidad ta yuda crea consciencia y desplega solidaridad,” el a conclui bisando.

Riba diabierna, 18 di november, comunidad di Aruba a demostra nan apoyo na Centro Man Na Obra cu nan bishita na McDonald’s Santa Cruz, Palm Beach y Seroe Blanco, y nan compra di BigMac.

McHappy Day ta un evento global cu ta genera miyones anualmente pa medio di restaurantnan di McDonald’s rond mundo pa obranan di caridad local. Arcos Dorados, e operador di restaurantnan McDonald’s na Latino America y den region di Caribe, a genera mas di 14 miyon dollar pa Ronald McDonald House Charities y otro organisacionnan durante di e campaña di McHappy Day e aña aki tambe.

Arcos Dorados ta e doño di frankisia mas grandi di McDonald’s mundialmente, den termino di benta y cantidad di restaurant. E compania ta opera e cadena mas grandi di restaurantnan di servicio rapido (Quick Service Restaurant/QSR) di Latino America y Caribe. Nan tin e derecho exclusivo pa ta doño di, pa opera y concede frankisianan di restaurantnan McDonald’s na 20 pais y teritorio Latino Americano y Caribense, incluyendo Argentina, Aruba, Brazil, Chile, Colombia, Costa Rica, Corsou, Ecuador, French Guyana, Guadeloupe, Martinique, Mexico, Panama, Peru, Puerto Rico, St. Croix, St. Thomas, Trinidad & Tobago, Uruguay y Venezuela.