Coridja Stars Productions pa medio di e komunikado di prensa aki ta anunsiá ku Miss Curaçao World Nashaira Balentien lo no partisipá na e sertámen Miss World 2016 na Washington DC manera anunsiá anteriormente.
Nashaira durante e último lunanan a bin ta prepará intensivamente pa e reto aki, e la biaha pa Chicago kaminda e la bai atendé tur lokual tabata tin de haber ku su “Gardarobe” serka Mac Duggal, tambe e tabata tin un media tour ku un entrevista na Univision den e programa Despierta con Zoe.
Durante nos estadia na Chicago nos a invitá Miss World 2010, Alexandria Mills pa bin topa nos i sera konosí ku Nashaira. Nos mester bisa ku tabata un enkuentro fruktífero, Alexandria a keda sumamente impreshoná ku Nashaira su personalidat i a ofresé mesora pa bira su mentor, pa gui’é pa e logra klasifiká den e finalistanan i trese e korona di Miss World Kòrsou.
Siman pasa Alexandria Mills a biaha pa Kòrsou, kaminda e por a eksperensia Nashaira den su mes ambiente i tambe wak e proyekto ku Nashaira tabata trahando riba dje pa su “Beauty with a Purpose” i asina gui’é mas dirèkt riba su partisipashon na Miss World.
Esaki nan tabata gastunan ku nos komo Coridja Stars Productions a tuma na nos enkargo, komo nos tabata konvensí ku Nashaira tabata tin e potensial pa trese e Korona di Miss World Kas.
Coridja Stars Productions ta lamentá ku maske nos a hasi tur esfuerso di nos banda, tòg tin algun detaye ku no a wòrdu konkretisá dor di e organisashon ku tin e lisensia di Miss World aki na Korsou na tempu, pa ku e organisashon di Miss World.
Tambe informashonnan ku no a yega na tempu serka nos, pa por a atendé korektamente, pe: e “Media Challenge” i e Facebook Page di Miss World – Curaçao tambe no a wòrdu lansa, pues esakinan tur ta trese Nashaira den desbentaha. Motibu pa kual nos disidí di hala tras ku partisipashon di Nashaira Balentien na e sertámen Miss World 2016, nos no ta haña ta responsabel pa nos sigui invertí di e forma ku e kosnan ta bai.
Coridja Stars Productions lo bai hasi su máksimo esfuerso pa buska un sertámen di un nivel haltu kaminda Nashaira Balentien lo por bai representá Korsou dignamente manera e meresé.