Gobièrnu di Kòrsou a otorgá e prestigioso Premio Boeli van Leeuwen 2013 na Tania Kross, Randal Corsen i Carel de Haseth pa nan obra konhunto “Katibu di Shon”. Esaki ta e di tres biaha ku Gobièrnu di Kòrsou ta otorgá e premio balioso aki. A otorgá Premio Boeli van Leeuwen for di 2009, kada dos aña na un òf mas persona òf organisashon ku a alkansá  prestashon intelektual  ekselente riba tereno kultural, hurídiko, gubernamental, sosial òf periodístiko. E prestashon di e ganador  mester ta ehemplar, e mester inspirá i habri bista di komunidat i e mester surpasá frontera di Kòrsou. Kada un di e ganadornan, riba nan propio manera i salí for di nan propio speshalidat i kompetensia a duna un  kontribushon na un dimenshon nobo di nos herensia kultural ku e promé ópera na Papiamentu‘Katibu di Shon’, ku a konosé su estreno den yüni na Hulanda. Ku gran satisfakshon hurado a disidí ku Premio Boeli van Leeuwen 2013 ta bai na Tania Kross, Carel de Haseth i Randal Corsen pa nan prestashon konhunto i pashon di ocho aña i e nifikashon úniko ku esaki tin pa historia di herensia musikal i literatura di Kòrsou. Entrega di e premio a tuma lugá djaweps 10 di òktober 2013 na Avila Beach Hotel. E organisashon tabata den man di Kas di Kultura. Interesadonan por mira e programa “Entrega Premio Boeili van Leeuwen 2013”, djaweps awor dia 31 di òktober i tambe  djamars 5 di novèmber  na kanal 80 di TDS. Riba e potrèt nos por mira e ganadornan di Premio Boeli van Leeuwen 2013, huntu ku Vice Prome Minister sr. Etienne van der Horst ku a hasi entrega di premio. D.r.p.d. Sr. Carel de Haseth, Sra. Tania Kross, Ir. Minister van der Horst i Sr. Randal Corsen.