Concierto di aña cu mas o menos 8 mil hende den Carnival Village na San Nicolas. E miho bandanan di Aruba a topa cu e “Queen of Bacchanal” Destra!

ORANJESTAD, Aruba – 25 di october 2016: “Nos a keda hopi satisfecho, esey tabata un berdadero celebracion di pueblo”, asina Alvin Koolman, director di Refineria di Aruba, a duna di conoce riba escenario compaña pa Prome Minister Mike Eman y Minister Mike de Meza. Di e forma aki a celebra reapertura di nos refineria y alabes celebra cu despues di 92 aña nos refineria porfin ta den nos man. E evento pa celebra reapertura di nos refineria a tuma luga diasabra ultimo den Carnival Village na San Nicolas, desde 4or di atardi y a sigui te den oranan laat cu un lista largo di bandanan musical cu a presenta pa e publico presente. Polis ta calcula cu mas o menos 8 mil hende a acudi na e evento aki.

E agrupacionnan y DJnan a varia for di DJ Mike Ross, OBS Brassband, presentacion di Popcorn Dancers, Vince Irie, Tsunami Aruba, Janiro Eisden, Le Groove, show di vuurwerk, OREO y pa cera e anochi, a presenta e reina di Soca, esta Destra! E ambiente den Carnival Village tabata di celebracion, den cual a conta cu presencia di Ministernan, Parlamentarionan, ehecutivonan di CITGO, PDVSA y otro invitadonan. Tabatin dos Minister di Sint Maarten cu tabata na Aruba pa trabou, cu a probecha pa bin mira e presentacionnan y a keda masha impresiona. Ya caba trabounan a inicia den e refineria y ta spera cu den e siguiente simannan lo por tende y mira hopi mas di e cambionan cu lo tuma luga y e proceso di renobacion cu a inicia.