Willemstad: E di 3 wikènt di òktober mundialmente e movementu di scout WOSM ta òrganisa e evento di Jota Joti kaminda scoutnan di mas ku 150 pais rònt mundu ta hasi uso di medionan di radio o internet pa asina komuniká ku otro. Scouting Antiano tambe a forma parti di e wikènt aki kaminda e scoutnan di Kòrsou, Boneiru, Aruba I tambe e organisashonnan di AJMG, AGPNA I Brigada di Seguridat I Formashon a topa otro na kampeercentrum Brakkeput pa por eksperensiá Jota Joti.

Jota ta nifiká Jamboree on the Air I ta wòrdu òrganisá pa di 59 biaha. Joti ta nifiká Jamboree on the Internet I ta wòrdu òrganisá pa di 20 biaha.

E tema mundial e aña aki ta ‘Discover our world’ I Scouting Antiano a dun’e un toke kultural I nos a usa e tema ‘Discover our island’. Asina aki tur e partisipantenan di e kampamentu por a sera konosí ku algun parti di Kòrsou durante di e wikènt aki I tambe nan a demostrá kon nan ta bende nan dushi pais Kòrsou na turistanan pa asina nan tambe por kontribuí na tursimo di Kòrsou. Nos kier a gradisí tur nos spònsernan ku a koperá pa e scoutnan por tin un dushi wikènt. Riba e potrètnan por mira na momento ku e scoutnan ta hasiendo nan aktividatnan di komunikashon.