Mesun bandanan, mas ambiente y na San Nicolas Dia 7 di october

ORANJESTAD, Aruba – 3 di october 2016: Manera anuncia na diferente emisoranan local y rednan social promotornan di “Chill The Concert” pa motibo di mal tempo a dicidi di hala e concierto grandi “Chill The Concert” pa diabierna awor dia 7 di October 2016. E mesun bandanan esta di Hulanda Cache Royal, Gentz di Corsou y di Aruba Buleria, Tsunami y Jeon lo ta hunto riba un solo escenario.

E no tabata facil pa por haci tur e cambionan di vuelo, hotel y disponibilidad di e bandanan pero e cambio ta un hecho. Importante tambe pa menciona cu e localidad ta keda San Nicolas (Chill District) pero e stage principal lo ta riba e area di parkeo banda di Arubus su stop principal. Ful e area lo ta completamente cera y e entrada lo ta banda e rotonde chikito. Locual ta e VIP Area esaki lo ta riba un otro stage eleva pega cu e stage principal.

Pa loke ta e evento mes e portanan ta habri pa 7’or di anochi unda cu lo tin un presentacion di sorpresa mientras cu tur hende cu drenta entre 7’or cu 9’or lo ricibi un cerbes Chill como regalo. Naturalmente lo tin dos bar bon ekipa, un bar apart pa VIP y un cushina bon surti.

Elite Productions kende ta encarga cu zonido, stage y luz a prepara un diseño unico pa e stage y hunto cu Scaff Pro lo traha un VIP Area sumamente fuera di lo normal. Carchinan general ta bayendo manera pan cayente na Hamaka Side Walk Café, Tinashi Music & Sports Pub y Gallo Rojo. Pa Mesa di VIP y VIP single por yama 7446480. E evento ta “Powered By” Chill, Dewar’s, Bacardi, Elite Productions y Printshop.