Semper mi tábatin un pashon inmenso pa músika. Esaki sigur mi a heredá di mi mayornan kual tambe tin un amor grandi pa músika. Mi tata (en pas deskanse) riba e area di músika klásiko i mi mama riba e tereno karibense, latino i pòp. Último añanan, mi pashon pa músika a kue un forma ineksplikabel. E echo ku mi a skohe pa entregá mi bida den man di Kristu Hesus, a poné mi haña un otro mirada riba mi talento musikal. Mi músika a kue un rumbo muchu mas profundo. Awor e tin aun mas nifikashon i alabes e ta un alabansa i adorashon na nos Dios.

E produkshon nobo titulá “Un Pèrsona”, ta un muestra kon Dios Haltísimo por transformá nos ku ta Su kreashon, na momentu ku nos permití E obra den nos bida. E produkshon ta bai muchu mas leu ku djis músika. E meta prinsipal ta pa Dios su kreashon, esta hende, regresá bèk serka djE i eksperensiá bida na abundansia. E produkshon aki lo papia espesialmente na esnan ku kurason kibrá. Ku un dulsura, amor i dedikashon deponé den e produkshon, mi ta konfia Señor ku mi meta lo ser alkansá.

“Un Pèrsona”, e album nobo di Brian Dekkers. Keda pendiente p’e!