Cu mas di 150 artista local y internacional

ORANJESTAD, Aruba – 15 di September 2016:  Diabierna, diasabra y diadomingo Aruba Art Fair ta haci un “take over” di e curazon di San Nicolas pa e di prome edicion di e festival grandioso di arte den tur su diferente facetanan y un sinfin di disciplina.

Brouwerij Nacional Balashi y The Tropical Bottling Company, como sponsornan orguyoso di e evento unico, ta invita comunidad henter y tur bishitante pa disfruta di e evento cu ta “kick off” diabierna cu un show di moda y un cena eskisito. Durante di henter e festival lo tin na benta obranan di arte di artistanan local y internacional, trabaonan di artesanonan local, y cuminda di diferente restaurant local cu nan “pop up restaurants”.

Riba diasabra y diadomingo Aruba Art Fair ta habri for di 6’or di atardi pa 12’or di anochi. Lo tin presentacion di poesia, canto, baile, artistanan, artesanonan di e proyecto Korteweg y publico por admira y cumpra arte di artistanan local y internacional den e diferente galerianan di arte temporal, y permanente.

Brouwerij Nacional Balashi y The Tropical Bottling Company ta contento y orguyoso di ta co-anfitrion di Aruba Art Fair y ta encurasha tur hende pa atende.