Willemstad –E Sala di Yegada nobo den e edifisio renobá na aeropuerto di Kòrsou ta operashonal. Durante e asina yamá periodo di ‘soft-launch’, Curaçao Airport Partners lo mónitor i analisá e proseso i e eksperensia di e biahero, bishitante i usuario di aeropuerto. E Sala di Yegada (Arrivals Hall) ta keda den e parti o-este di aeropuerto di Kòrsou.
Introdukshon di e área nobo di yegada, entre otro e ofisinanan nobo di Duana, e Sala di Yegada i e área di Car Rental modernisá, ta un momentu sumamente importante den e proyekto di ekspanshon di Curaçao International Airport. Parti di e proyekto di ekspanshon ta e traspaso pa e Area di Yegada nobo(Rival Hall), kual a wòrdu trasladá for di e alokashon pafó, pa e gran área kubrí den e edifisio o-este. Un pasio temporal ta guia e biaheronan pa e parti renobá di e Sala di Yegada, kaminda tin un ambiente agradabel i fasilidatnan manera entre otro pronto e komedor i bendedó di eiskrim ‘Belle Italia’. Durante e ‘soft-launch’ CAP, den kolaborashon ku kompanianan gubernamental i usuarionan di aeropuerto, lo analisá e eksperensha na aeropuerto, i kaminda nesesario trese mehorashon.
Inougurashon
Djaweps dia 8 di Sèptèmber Curaçao Airport Partners a inougurá e Sala di Yegada nobo, durante un seremonia festivo den presensia di dignatario, representantenan di gobièrnu, komunidat di aeropuerto, partnernan lokal i internashonal den mundu di aviashon i turismo. Esaki a tuma lugá den e Sala di Yegada (Arrivals Hall) kual pa e okashon aki tabata klasikalmente dòrná. Minister Rhuggenaath (Desaroyo Ekonómiko), CEO di CAP Ralph Blanchard, Direktor di CAH Junny Ignacio i Hefe di Duana Jules Ilario, a hiba palabra na e invitadonan, i despues di esaki a siguí un tremendo presentashon dor di Randal Corson, Pernell Saturnino, Eric Calmes, Jean-Jacques Rojer i kantante di músika ‘soul’, Shirma Rouse.
Komo punto sentral speshal pa e Sala di Yegada, Curaçao Airport Partners a laga produsí un réplika di e históriko avion Fokker di KLM konosí komo ‘De SNIP’, kual tabata e promé avion ku a bula e ruta di Hulanda pa Kòrsou den 1934.
Proyekto di ekspanshon i sistema nobo di parker
E aña aki CAP tambe a inisiá trabounan di konstrukshon pa realisá e terminal nobo ku lo konektá e dos edifisionan di aeropuerto ku otro. E terminal nobo ku tres piso lo ofresé 50% mas espasio ku aktualmente ta e kaso i lo ofresé un infrastruktura ku lo promové un mihó fluho di e biaheronan ku ta yega òf sali, i alabes lo trese un mihó separashon entre e biahero ku ta keda i e biahero tránsito. Tambe lo bin un di dos Mirador riba e terminal, algu ku CAP ta rekonosé ku ta importante pa komunidat di Kòrsou.
Den komienso di 2017 tambe lo kambia e sistema di parker pa e mesun sistema ku tin na Schiphol i London Heathrow, ofresiendo e usuario machin di pago moderno den entre otro e Sala di Yegada nobo, kaminda por paga ku sèn kèsh of pa medio di swipe of credit card. E trabounan pa ekspandé Curaçao International Airport i mehorá e aparensia i esfera ta progresando ku velosidat, i ku e ophetivo pa e biahero, i esnan ku ta laborá na aeropuerto, òf ku ta bishitá aeropuerto, por disfrutá di un eksperensia ekselente.