Willemstad, Na okashon di 75 aña di eksistensia di PSC/KAP, asosashon di mayornan a disidi di saka un buki di rekuerdonan di PSC, Titulá : Humans of PSC

Ta trata di rekuerdonan di e personanan ku di un of otro manera a forma parti di e historia riku di e skol ku a produsí hopi yu di Kòrsou eksitoso. Pa por yega na e historianan aki nos ta hasi un yamada na èks alumno, èks dosente, èks trahadonan i tambe mayornan di PSC, ku ke komparti nan historia. Nos ta buska anékdota, potrèt, grabashon i kualke otro tipo di rekuerdo, manera un rapòrt di hopi aña pasá, un “te laat brief” òf “schoolblad” pa nos por publiká den e buki òf riba facebook.

For di tur e material ku nos risibí, asosashon di mayor lo hasi un selekshon di e historianan mas impaktante, chistoso, interesante i úniko. E buki ta fungi komo un regalo tangibel i duradero pa e skol.

Pa motibu ku nos ke publiká e buki aki promé ku final di aña eskolar 16/17, mester entregá tur material promé ku dia 30 di Novèmber 2016. Nos kier publiká e buki pa mas tardá Mart 2017. E fondonan ku keda rekoudá dor di benta di e buki aki, lo keda usá pa alsa kalidat di e skol pa e alumnonan aktual i esnan di futuro.

Forma parti di e proyekto aki i tuma kontakto ku asosashon di mayor via facebook facebook.com/humansofpsc òf via email humansofpsc@gmail.com

Nos ta konta ku bo aporte pa nos por konta e historia di PSC.