Willemstad – Entrante djaluna 12 di sèptèmber awor tur pasahero lo pasa via un sala di yegada nobo pa drenta Kòrsou. Esaki ta tuma lugá den e edifisio renobá, konosí komo e edifisio bieu di Hato. Duana tambe a muda pa e parti aki. E mudansa aki mester kondusí na un kòntròl mas efisiente di Duana riba ekipahe, produkto i sèn ku drenta Kòrsou. Pasaheronan ku yega ta haña diferente indikashon kua salida e mester tuma. Lei ta stipulá kiko ta haña eksonerashon di impuesto i pa kiko ta obligá di deklará i paga impuesto. E señalnan koló bèrdè ta indiká e salida ku un pasahero ta skohe ora e no tin nada di deklará i esun kòrá ta indiká ku e tin produkto òf sèn ku mester deklará.

Na diferente parti di e koredor direkshon pa kòntròl di Duana ta haña separashon di e kolónan. Na man robes lo tin bòrchi kologá i den e gang, señal abou na suela i muraya di fèrf koló kòrá ku ta indiká ku si tin algu di deklará mester sigui e salida ei. Na man drechi lo tin e mesun tipo di señal pero koló bèrdè ku mester sigui si no tin nada pa deklará. E señalnan aki tei netamente pa alertá tur pasahero for di trempan pa skohe konsiente e salida korekto. Uso inkorekto di e salida bèrdè ta kastigabel pa lei.

Si un pasahero ke drenta Kòrsou ku algu ku el a optené for di eksterior ku ta surpasá e kantidat, peso òf balor ku lei ta pèrmití e mester deklará esakinan i paga impuesto. Produktonan di tabako, bibida alkohóliko stèrki, perfume i Eau De Toilette, kòfi i te ta haña eksonerashon pa drenta Kòrsou pero ta mará na sierto kantidat, peso i balor. Esaki ta konta tambe pa tur otro produkto ku optené òf kumpra den eksterior òf na ‘Duty Free” te na un balor di NAF. 200,00 pa personanan di 15 aña òf mas. Pa personanan bou di 15 aña e montante ta NAF. 65,00. Pasaheronan ku ta kai bou di e kategoria aki mester sigui e salida bèrdè. Tur produkto personal òf produkto di karakter komersial optené den eksterior ku ta surpasá NAF. 200,- na balor mester deklará i paga impuesto. Sèn transportá pa un persona òf un grupo ku ta biaha huntu ku surpasá e balor di NAF. 20.000 mester deklará esaki. Ku otro palabra e dos delaster kasonan menshoná mester sigui e salida kòrá.

Lei ta eksigí tambe pèrmit pa importá sierto produkto òf ku mester tin eksonerashon òf un deklarashon por eskrito. Ta trata di arma di kandela i munishon, supstansia ku ta kai bou di Lei di opio, produkto imitá/kopiá òf plagiat, bestia morto (òf partinan/produktonan di dje), bestia bibu, karni i belèg di karni (di tur sorto di bestia), mata i flor. Limitashon di e balor menshoná no ta konta pa produkto importá temporal.

Duana ta alertá ku uso inkorekto di e salida bèrdè por resultá, banda di pago di impuesto ku por ta e pasahero no a konta kuné, riba un but ku ta variá di 300 pa 400% riba e balor real. Den e kaso ei e pasahero mester laga e produktonan atras serka Duana i tin 2 dia di tempu pa atendé òf paga e impuestonan konserní. Despues di e 2 dianan aki Duana lo pone e  merkansia/artíkulo/produkto den depósito i lo apliká tambe gastunan di almasenahe.  Duana ta urgí pues tur persona ku ta biaha pa eksterior i tin idea di drenta ku produkto, regalu òf sèn ku optené for di eksterior pa tuma bon nota di loke no ta pèrmití pa drenta Kòrsou, kiko ta haña eksonerashon òf ki ora mester paga impuesto, pa hasi e eskoho korekto.

Ta bon pa rekordá tambe ku kòntròl di Duana ta aportá na seguridat i salubridat di nos pueblo. E ta evitá ku produktonan ilegal i peligroso ta drenta nos pais i ta kontribuí na desaroyo ekonómiko dor di kobra impuesto riba importashon. Pa mas informashon di e kantidat, peso i sorto di produkto ku ta pèrmití pa drenta Kòrsou por bishitá e website di Duana www.douane.cw.