WILLEMSTAD- 9 di sèptèmber 2016 – Curaçao North Sea Jazz Festival (CNSJF) a posishoná su mes komo e evento musikal di mas grandi di nos isla i un di esnan mas rekonosí den Karibe. Tur aña di nobo tin bishitante di rònt mundu ku ta bishitá e festival. Kada bishitante ta aportá na éksito di e festival. Sr. Kawamura Tetsuya pa 5 aña konsekutivo ta biaha for di Hapon spesialmente pa e por disfrutá di e festival i di nos isla.

Fundashon Bon Intenshon i Ofisina di Turismo di Kòrsou (CTB) representá pa Minister di Desaroyo Ekonómiko sr. Eugene Rhuggenaath a topa ku sr. Kawamura Tetsuya i a interkambiá di su eksperensia durante e 5 añanan  ku e ta bishitando e festival. CTB tur aña di nobo ta aportá ku promoshon internashonal di e festival i durante e festival ta ‘host’ periodistanan internashonal ku na nan turno ta sòru pa kompartí e informashon di e festival den e merkadonan mas importante pa nos isla. CTB ta felisitá Fundashon Bon Intenshon pa un eksitoso di shete edishon di CNSJF.