Kurso para di Kòrsou

Curassavica N.V. i Curaçao Footprint Foundation ta kuminsá dia 21 di sèptèmber ku e di 4 edishon di e Kurso ‘Para di Kòrsou’. Tur hende ku gusta opservá para den mondi i ku ke sa mas di e grupo di animal fasinante aki lo haña informashon i konosementu amplio tokante tur diferente tipo di para ku ta brui aki, esnan ku ta bishitá Kòrsou ora nan migra i tambe e komportashon interesante di e animalnan aki.
Den e kurso aki nos ta pone atenshon na e desaroyo di para, anatomia i fysiologia, komportashon di para, e relashon di hende ku para banda di e diferente sorto di para ku ta biba i tambe bishitá nos isla.

Kòrsou konosé mas ku 50 tipo di para ku ta brui aki i mas ku 200 tipo di para ku ta konosí komo para ku ta biaha (trekvogels). Esakinan ta para ku ta biba i brui na otro pais pero ta bula bai den direkshon di área mas kayente ora wer den nan pais di orígen ta bira friu. Personanan ku tin interés den para no mester hasi masha kos pa haña e posibilidat di opservá e tipo di bestia aki. Ku mas informashon tokante e grupo di bestia aki, e eksperiensia di opservá ta bira mas interesante ainda.

E kurso ta konsistí di 9 seshon, di kua 3 ekskurshon den diferente área di naturalesa riba nos isla. Tur hende ku ta interesá di sa mas di e grupo di para i tambe persona ku ta traha komo guia den turismo of ke amplia nan konosemente tokante naturalesa di nos isla lo haña indormashon sumamente balioso. Dosente di e kurso aki ta ing. Michelle da Costa Gomez i drs. Leon Pors. Partisipashon ta kosta 396 florin pa person inkluí 6% di ob, material i tambe kos di bebe i snack durante tur seshon. Ta duna lès den tantu Papiamentu i Hulandes.

Pa mas informashon tokante e kurso por yama e number 522-8289 òf manda un mail pa info@curassavica.com. Tur fecha i orario di e kurso i e formulario di inskripshon ta publiká riba nos website www.curassavica.net.