Toyota ta produciendo autonan cada bes miho pa Latino America

ORANJESTAD, Aruba – September 2016: Cu meta pa produci autonan cada bes miho den e region y cu un inversion di 46 miyon R$, siman pasa Toyota a inaugura e prome Centro di Investigacion den Latino America y Caribe, situa den su planta na Sao Bernardo do Campo (Brasil). E inauguracion di e centro aki ta parti di e proyecto di revitalisacion di e planta di Sao Bernardo do Campo, e prome fabrica di autonan di Toyota pafo di Japon, cu a inicia operacion na 1962.

E Centro di Investigacion lo concentra e actividadnan relaciona cu investigacion y desaroyo di productonan nobo, piesa y accesorionan. A muda tur actividad di ingenieria, compra, regulacion di vehiculonan y garantisa calidad na e luga nobo, locual ta permiti mas integracion y creacion di sinergia entre areanan cu e obhetivo di desaroya e potencial di proyectonan den futuro. Ademas, a construi tambe un Centro di Diseño di Producto nobo den e planta, e prome na Latino America. E Centro di Investigacion lo ta e base pa desaroyo di productonan, incluyendo mehoracion di productonan local, prueba di emisionnan y analisis di materia prima, entre otro.

A crea e division di Toyota pa maneha actividadnan den e region di Latino America y Caribe na aña 2013 cu nombracion di Steve St. Angelo den e posicion di CEO. For di e momento ey, e participacion di mercado di Toyota den e region a aumenta di 5.3% na aproximadamente 10%. “E inauguracion aki ta reforsa nos compromiso cu Brasil y henter region di Latino America y Caribe. E centro aki lo permiti nos realisa cambionan rapido alinea cu nos mision di desaroya “Autonan cada bes miho”, asina Steve St. Angelo, CEO di Toyota pa Latino America y Caribe a finalisa bisando.