ORANJESTAD – Minister Otmar Oduber, encarga cu e.o. Turismo, ta bisa den un declaracion cu e idea no ta pa kibra All Inclusive sino pa regula esaki y sigura futuro di Aruba. Y a sigura cu a keda espacio ainda pa cierto cantidad di cambernan all inclusive, pero cu esakinan mester ta pariba di brug.

Diamars despues di hopi debate den Parlamento, e Ley di All Inclusive a wordo aproba door di mayoria. E mandatario a bisa cu despues di practicamente tres aña cu a cuminsa cu e discusion di e tema di All Inclusive ora cu Westin a wordo bendi cu RIU y despues cu casi Radisson tambe a wordo bendi cu un compania All Inclusive, a dicidi cu Gobierno a accelera un aña pasa e proceso pa busca un miho regulacion, (miho ley) pa evita cu Aruba ta haya un cantidad di All Inclusive (excesivo)cu lo no contribui na e mescla cu ta busca pa producto Aruba.

Den Parlamento e mandatario a bisa cu tin personanan cu ainda no a compronde  e mensahe di e ley. E ley no ta delinea si e All Inclusive ta bon of malo, pero ta busca lo miho pa Aruba. “Nos no kier corre cu All Inclusive for di Aruba of para e industria di All Inclusive. Nos kier pa e forma parti di un mescla cu ta balansa, manera cu tabatin te na e momentonan aki entre loke ta All Inclusive y e cambernan regular (EP), como tambe timesharenan.

E mandatario a trece dilanti cu durante e reunion di diamars poco tabata e contenido cu a bini dilanti di parti di oposicion y e contribucion na e reunion. “Hopi a pidi pa cooling off periodo y a lubida cu mientrastanto 5 luna a pasa desde cu esaki a wordo poni na luna di mei. Ningun alternativa a bini riba mesa pasobra ta pesey tabatin un solo opcion riba mesa. Pesey durante e ultimo 3 añanan no por a pensa riba un otro forma pa regula esaki. Ta papia di regula pasobra nos ta keda kere cu All Inclusive ta importante pa ta parti di e totalidad pa Aruba. Y mi ta contento toch cu durante e Cooling Off Period ey cu a tuma luga durante 5 lunanan prome cu e reunion Banco Central tambe a saca un rapport. No solamente riba e parti di e impacto economico cual tabata mustra hopi cla cu e placa cu ta wordo laga atras di e turista All Inclusive ta menos cu esun cu ta bini pa un camber regular. Pero tambe a pidi un di dos opinion legal riba e ley na Parlamento y cu a wordo aproba diamars cu 12 voto na fabor. E di dos opinion tabata completamente den e mesun linea cu loke Gobierno tabata para pe y e ley cu a bay Parlamento a para p’e. E ta dunami un satisfaccion. E amienda cu fraccion di MEP a bini cune ta un amienda cu en realidad ta sostene e ley, cu na tambe kier mira cu e cantidad di cambernan All Inclusive no ta crece na Aruba. Fraccion di MEP kier a bay un tiki mas leu y no kier a laga espacio mes pa tin crecemento.”

Aworaki, e mandatario a sigui splica, cu e cantidad di cambernan All Inclusive ta na 34 porciento  e ley ta papia di yega te na 40, pero segun e maneho cu Gobierno tin, esaki no por tuma luga pabou di brug. Gobierno ta bay ratifica esaki den un MB, cu a keda palabra entre Oduber y Minister Schwengle, y cu ta brinda un oportunidad pa e diferencia di 6% cu ta representa 540 camber por bay solamente San Nicolas. Cu e amienda di MEP a cera e porta. “Pues pa MEP San Nicolas no ta haya e oportunidad si un dia den futuro nos haya un cadena hotelero interesa. Shete aña largo bou gobernacion di MEP a wanta un desaroyado na linea cu tambe tabata kier a bini cu un all Inclusive. Tin un area cu no ta suficientemente desaroya cu por pone un cadena di hotel di renombre halto. Pesey bo tin cu crea e posibilidadnan pa un desaroyo por surti di e tipo di hotel cu ta pone na San Nicolas. Lamentablemente cu MEP a bini cu e ambienda aki, pero di otro banda nos ta hopi satisfecho cu Parlamento a aproba e ley cu awor mester cuminsa cu su ehecucion.”