Na komienso di luna di yüli 2016 Selikor NV por a inisiá ku trabounan di limpiesa riba kamindanan prinsipal i den barionan ya ku Gobièrnu di Kòrsou a pone e fondonan nesesario pa esaki disponibel. E limpiesa ta entre otro den kuadro di e programa di Gobièrnu pa eliminá fokonan di sangura ku ta kousa por ehèmpel e malesa di Zika.

E promé fase di e proyekto di limpiesa ta práktikamente finalisá. A dividí e fase promé den 63 área i ya a kompletá limpiesa den mas ku 46 área. Áreanan di e promé fase ta entre otro: Baraltwijk, Corasol, De Savaan, Domi, Gasparito, Piscadera, Boca Sami, Habaai, Jandoret, Juandomingo, Julianadorp, Kas Chikitu, Klein Hofje, Mahuma, Marchena, Mundo Nobo, Sta. Helena, Sta. Maria, Veeris, Wishi, Buena Vista, Cabo Verde, Esperanza, Fortuna Abou/Ariba, Muizenberg, Kura Piedra, Monte Carmelo, Quinta Violetta, Salsbach. Te ku awor e limpiesa di e fase promé a produsí un total di 152.990 kilo di shushi. Un kantidat di kasi 300 persona di diferente kontratista a hasi e trabou di kua 15 persona via intermediashon di Unidat di Bario. E gastunan total di e trabounan akí a suma mas o ménos 640.000 florin.

Den luna di ougùstùs lo kaba tur trabou di limpiesa di bario di e promé fase i lo duna atenshon tambe na sitionan di deshasí di shushi ilegal den e barionan en kuestion. Tambe lo atendé e problemátika di outonan bieu para kantu di kaminda ku ta forma molèster i ta peligrá salu públiko. Den ougùstùs lo start tambe ku e di dos fase di e proyekto di limpiesa ku ta den barionan manera: Groot Kwartier, Emmastad, Sunset Heights, Kanga i Dein, Maripampoen, Steenrijk, Dominguito, Koraal Specht, Salina Harbour View, Janwe, Bottelier, Toni Kunchi, Zeelandia, Groot Davelaar, Biesheuvel, Mahaai, Jongbloed, Bonam, Sta. Catharina, Ronde Klip.

Selikor ta pidi habitantenan di e barionan menshoná pa kaminda ta nesesario duna koperá pa e trabounan di limpiesa kana optimal. Un apelashon ta bai tambe na habitantenan pa mantené e área rondó di nan kas limpi komo parti di nan responsabilidat síviko ku kada un di nos tin ku nos pais. Selikor ta konta ku un i tur su kolaborashon pa di e forma akí yuda mantené Kòrsou liber di shushi. Ta huntu nos ta logr’é.