Profound Projects, Trupial Media i HMIS (Hospitality Management & Investment Services) ta organisá un torneo di Pokémon Go pa hintér Kòrsou den sentro di siudat dia 27 di òugùstùs.
Willemstad: Pero prome laga nos puntra kiko ta Pokémon Go? E ta un wega grátis pa aparatonan di iOS i Android basá riba ubikashon den kual hungadónan ta sali foi kas bai buska kriaturanan animá (Pokémon) pa fangu den nan télefòn. Ya pa dos luna kaba el a bira un sensashon mundial anto naturalmente Kòrsou no a keda afo. E wega a bira asina popular akinan ku asta e hungadónan sa kausa fila den Punda ku Saliña den oranan di atardi! Dave Elossais di Trupial Media a bisa lo siguiente tokante e torneo: “E wega a pega aki na Kòrsou pero te ahinda kada bes ku hungadónan a bini huntu pa hunga e wega e tabata kasonan desorganisá i sin koordinashon. Imaginabu kon un gran evenemento e lo bira ora nos koordiné i organisá hungadónan den ekiponan ku oportunidad pa gana preis. E lo por bira un gran evenemento soshal tambe!”
Hopi kompania i organisashon a mira e potenshal di un torneo asina i nan tambe a duna nan aporte. Riba e lista tin pará: Chippie, Banco Di Caribe, CocaCola,
Renaissance Mall & Riffort, Curaçao Tourist Board i Downtown Management Organization. E torneo lo tuma lugá den oranan di atardi di 4:00 pm pa 7:30 pm den e bisendarionan di Punda i Otrobanda kaminda tur e artikulonan di e wega lo wòrdu ofrese i kaminda tres ekipo (blou, kòrá, hel) lo kompetí pa dominá e dos sedenan di Pokémon (gym). Lo tin live entertainment den Punda i Otrobanda pa henter famia disfruta. Ademas klientenan di Chippie ku tin data bùndel lo haña kobertura gratis e dia ei durante e torneo i klientenan di otro kompanianan lo por disfrutá di tremendo ofertanan di data ku Chippie lo bai ofresé, p’asina nan tambe por haña kobertura durante e evento aki. Partisipantenan ta risibi un shirt di e evenemento, bebida gratis, i lo tin chèns di gana premionan fabuloso. Bishitá nos página di Facebook na Pokémon Go Curaçao ‘Conquer The City’ pa haña mas informashon tokante e torneo. Karchinan ta optenibel na UTS Store Renaissance, Albert Heijn (Zeelandia) i Mensing’s Caminada òf ònline na www.pokemongocuracao.com i www.ticketscaribbean.com .