KRALENDIJK – Delta Security & Hospitality na Boneiru a será un areglo di penshun kolektivo pa su empleadonan na ENNIA, i di e forma akí ta invertí den futuro di su personal.

Desde awor Delta Security & Hospitality ta ofresá su empleadonan un areglo di penshun kolektivo flèksibel di ENNIA, kaminda e dunadó di trabou ta paga e prima básiko kompletu.  “Nos ta haña importante pa nos personal por traha riba un penshun”, sigun director Arthur Klootwijk. “Nos ta enkargá ku siguridat di hospital te na terenonan di negoshi, di tienda te hotèl, pero tambe di eventonan públiko. Nos negoshi ta basá riba konfiansa. Manera e kliente por konfia nos, awor ami ta konfia ENNIA. Nan ta regla i manehá e penshunnan i ami tin empleado satisfecho i loyal.”

Desde 2013 Security & Hospitality ta establesé na Boneiru, i entretantu ta disponá di mas ku 60 agente di vigilansha. Tur a pasa un prosidimentu di selekshon severo i profeshonal. Esaki ta pone ku tiki empleado ta drenta i sali servisio, i hopi di nan ta den servisio permanente.

E empleadonan a reakshoná sorprendí i hopi positivo riba e areglo ku a ofresé nan. “Mi ta haña penshun sin ku esaki ta kosta mi nada?” tabata un remarke hopi skuchá. Na prinsipio algun empleado tabata un tiki deskonfiá pa loke ta e konstrukshon flèksibel, pero despues di un splikashon di e konseheronan di ENNIA nan tambe a keda kontentu ku e areglo di penshun. “Mi dunadó di trabou ta paga mi prima básiko i ami mes no tin mester di paga nada, pero si mi ke mi por kontribuí si!”

ENNIA ta orguyoso di e areglo di penshun na midí pa Delta Security & Hospitality Bonaire i ta felisitá nan ku e areglo kolektivo flèksibel akí.