‘TrashOut’ App ta ser huza den mas di 100 pais!
WILLEMSTAD – Bo ta kore riba kaya i bo ta nota un kantidat di shushi, saka un potret di dje i kla: e shushi ta registrá riba un mapa digital. Esaki ta splika di un forma fasil kon e App ‘TrashOut’ ta funkshona. E fundashon Curaçao Clean Up ta hasi un yamada riba habitantenan di Kòrsou pa download i utilisa e App. Dor di registra shushi di e forma aki, e ta fasilita pa limpia Kòrsou durante di e proksimo Curaçao Clean Up Day, djasabra 24 di sèptèmber.
Fundashon Curaçao Clean Up ta yama ‘TrashOut’ e ‘Pokemon Go’ pa un miho medio ambiente’. “Un medio ambiente sano ta mas i mas topiko di importansia riba agenda sosial i politiko i Kòrsou ta den proseso di bira mas limpi. Maske tin adelanto, aun tin hopi shushi riba kaya”, segun voorzitter di direktiva Maarten Schakel. Ku ‘TrashOut’ tur hende por registra shushi, riba parkeerplaats na laman, banda di nan skol of rumba pa kas for di supermerkado.”
E meta di ‘TrashOut’ ta pa registra tur kaminda ku tin shushi ront mundo. Dor di enveolví suidadanonan den uso di e App, esnan ku a traha e aplikashon ke engrandese e responsabilidat konhunto pa un medio ambiente limpi. E App ta forma parti di e inisiativa ‘Let’s Do It, World Clean Up’, di un organisashon ku ta organisando un akshon di limpiesa mundial. Pa hasi esaki posibel mas di 100 organisashon konsiente di nos medio ambiente ta forma parti di esaki, i fundashon Curaçao Clean Up tambe ta un partner ofisial.
“Dor di aktiva mas tantu hende posibel na Kòrsou pa usa e ‘TrashOut’ App, nos ta spera ku e proksimo Curaçao Clean Up Day, riba djasabra 24 di sèptèmber, lo ta unu ku partisipashon di aun mas boluntario, aun mas entusiasmo i ku un miho bista riba e luganan ku mester un bon limpiesa”, Schakel ta menshona. “Esnan fanatiko por asta kolekta ‘badges’; Mas luga shushi bo registrá, mas haltu bo ramo ta subi.” Bo por download ‘TrashOut’ pa Andriod i iPhone. Bishita e pagina di Facebook di Curaçao Clean Up pa mas informashon.