Minister Oduber : “Mi ta haya e actitud di AHATA un poco descabeya.”

Mi ta haya un poco descabeya loke AHATA ta haciendo aworaki, door di no tin su miembronan den e hunta di supervision di ATA, na momento cu presupuesto 2017 ta den discusion. Pero tambe tin decisionnan grandi relaciona cu miyones florin cu mester wordo haci den e ‘high season’ cu ta biniendo y AHATA no ta envolvi. Pesey mi ta bisa ta iresponsabel e actitud cu AHATA ta tuma pasobra tin discusion riba un interes personal di nan miembronan pa loke ta trata e hotelnan, y a tuma un posicion cu por perhudica e interes general di pais, di turismo y futuro di Aruba.”Tur esaki, e mandatario a splica, ta relaciona cu e Ley di All Inclusive cu Gobierno kier bini cu ne.

Minister Oduber no por compronde cu di  algun parti di e sector di hotel na Aruba  kier compara nan mes cu Republica Dominicana. “Mi ta tene mi curason si esey a bira e pensamento awor di AHATA, cu nos ta bay compara nos cu un destinacion cu ta practicamente 90 porciento All Inclusive.” Y a sigui bisa cu ta papia aki di un destinacion cu ta cobra entre 90 pa 120 dollar pa camber, cu ta paga salarionan di 200 dollar pa luna na su empleadonan, cu ta luganan insigur cu e bishitantenan no por cana riba caya y ta keda cera paden. “Si esey ta e comparacion cu miembronan di AHATA of esnan cu ta publica remitidonan kier haci, anto mi desapunto ta hopi grandi den nan actitud aworaki, mas ainda cu AHATA cu tabata forma parti di Board di ATA y sa cua ta e vision cu e maneho di gobierno y ATA ta hiba pa tin un Aruba mas di calidad y pa trece turistanan di calidad pa gasta placa na Aruba unda cu nos tur ta come for di e bolo di turismo.

Awor mas ainda, e mandatario a bisa, e ta mas convenci cu riba e posicion cu Gobierno a tuma riba e Ley di All Inclusive , pasobra e ley aki ta no solamente salvaguardia e interes di e trahadonan di e hotelnan existente na Aruba,unda cu esnan cu ta traha den hotel manera Marriott ta baha cu casi 1500 dollar di tips pa luna mientras cu esnan di RIU of Occidental ta haya hopi menos na tips. “Bo ta haya sa di biaha e ora ki tipo di turismo nos kier pa Aruba.”Ta lamentabel  e menasa y intimidacionnan cu tin contra esnan cu ta apoya e ley di All Inclusive, inclusive chantahe di cierto cadena hotelero cu kier perhudica esnan cu no ta di acuerdo cu nan.  E ta contento cu e reaccionnan riba rednan social, unda 80 porciento di comentarionan ta bisa cu nan no ta di acuerdo cu e posicion di AHATA. Pero nos ta para pa e hendenan cu ta traha den e restaurant, cu ta bende den e ‘retail store’ nan, na e ‘watersport’ nan. Pesey nos ta lamenta e posicion di cierto miembronan di AHATA. Di otro banda e ta admiti cu tin hotelero cu no ta di acuerdo cu e posicion tuma door di AHATA y ta spera cu e situacion no daña e relacion den futuro.

Minister Oduber a enfatisa cu Gobierno t’ey pa sirbi comunidad y no e interes personal di algun hende cu kier bende nan hotel cu un compania All Inclusive. No por perhudica Aruba pa e motibo aki y e ta spera cu sano huicio por prevalece. E ta sinti cu el a cumpli cu su responsabilidad cu e ley cu tin na Parlamento y ta spera cu ningun hotel bay bende un camber All Inclusive den e proceso aki.