Turistanan Hoben kier conoce mas di e isla, mas cu e beachnan, principalmente cosnan cultural

ORANJESTAD, ATA su representante a compaña Minister Otmar Oduber (di Cultural) durante un bishita na Plaza Libertador Betico Croes. E motibo ta cu ATA tambe a pone di su banda pa e renobacion di e plaza por a tuma luga, hunto cu fondonan di TPEF, UNOCA y Cultura.  E trabounan na e proyecto riba Plaza Betico Croes a costa rond di 1.4 miyon florin y por bisa cu e ta practicamente cla. Segun calculo haci, pa otro luna e proyecto lo ta cla pa wordo entrega. Na final e ta un plaza cu a conoce un cambio basta grandi compara manera cu el a wordo construi 30 aña pasa.Susan Wout, Destination Services Executive di ATA, a splica cu e plaza riba su mes ta un atraccion turistico. ATA a constata cu hopi mas e bishitantenan cu yega Aruba ta interesa den e aspectonan cultural di e isla. Ora cu ATA a haya e peticion pa yuda den renobacion di e plaza, a sinti cu esaki ta algo cu nan por contribui cune y importante pa participa den dje. El a splica cu tur evento cu tuma luga riba e Plasa ta wordo hinca riba e calendario di evento di ATA cu ta disponibel pa e bishitantenan lesa. E site aki ta uno cu sigur turistanan ta bay riba pa busca cual ta evento of areanan cu nan por bishita. E ta hopi uza tanto door di turistanan crucero como esnan cu ta yega cu avion. E plazanan aki ta contribui pa haci centro di ciudad mas atractivo pa e turistanan. Aunke cu e ta un poco leu, turistanan crucero ta bishita tur areanan di Aruba. Turistanan Europeo y esnan hoben kier conoce mas di e isla, mas cu e beachnan, principalmente cosnan cultural. Pesey ATA a inverti rond di mey miyon den e proyecto aki, specialmente riba e parti di podium. Den e recorido por a tuma nota cu tur e cambionan y e trabaonan a keda haci y di parti di ATA tambe nan ta contento con tur cos ta canando y ta spera anciosamente na momento cu entrega e edificio bek.