Resientemente e grupo di karnaval Crazy Diamonds a hasi presentashon di nan trahe di Karnaval 2017 pa su miembronan i algun invitado. Durante e anochi aki a presentá e tema pa Karnaval 2017 ku ta “ Ban  Selebrá Bida”. E tema aki a wòrdu skohe pa ilustrá ku si bo ta na bida, ta un motibu pa selebrá!

E tema Selebrá Bida a originá for di e pelíkula di animashon “ The Book of Life”. Den kultura Mehikano ta hasi uso di un dia special pa selebrá E ser nan kerí ku ya kaba a bai laga nos na un forma masha partikular. Tur hende ta selebrá ku e kosnan mas gusta di e persona ku ya no tei mas.   Si e persona kerí aki tabata gusta bolo, fruta òf flor ta pone esaki nan pa asina rekord’é. I asta por pone su beter preferí! E tradishon aki a originá serka e indjan nan Azteca i na momentu ku Europeonan a invadí e kontinente Amerikano nan  tambe a tuma over e kultura pa selebrá e fiesta di e Diosa aki. Atraves di aña nan e fiesta aki a wòrdu adaptá i ta wòrdu selebrá den diferente pais i forma.

Pakiko Selebrá Bida?

For di e momentu ku wòrdu anunsiá ku un yu ta bin na mundu ta un selebrashon. Asina pa kada okashon den bida nos ta siguí selebrá; nansementu, boutismo, promé aña, e di sinku aña, dies, selebrashon di 15, 21, 40, 50, 75 i asta pa esunnan ku tin un poko mas suerte den bida nan por selebrá 100 aña. Den bida tur hende ta selebrá sigun nan forsa, nan deseo i smak. Tambe nos ta selebrá risibimentu, graduamentu, reibeweis,  kasamentu … asina por siguí menshoná. Tin hende asta ta selebrá nan divorsio, pues pa kualke motibu nos ta selebrá den bida.

Un di e kos nan mas great den bida ta pa, SELEBRA KARNAVAL. E fiesta aki ta dushi, e ta duna tur hende e chèns pa un bes pa aña Selebrá Bida manera nan ta deseá.

Selebrashon ta un parti esensial di bida i p’esei Crazy Diamonds a kis pa “ Ban  Selebrá Bida” durante KARNAVAL 2017 na un manera úniko.

Crazy Diamonds manera semper ta trese algu otro i a kis e tema aki “SELEBRA BIDA”  ku e pensamentu ku nos tei pa keda, pues Crazy Diamonds for Ever!

Animashon musikal pa Crazy Diamonds pa Karnaval 2017 lo ta na enkargo di ‘DREAMS 2’.

Durante próksimo Gran Marcha nos lo introdusí un Sekshon Blue Diamond: E sekshon nobo aki lo wòrdu koordiná pa e konosido Bert Isenia. Músika den e sekshon aki lo ta na enkargo di DJ RO-1 ku lo sòru pa un tremendo ambiente. Trahenan ku lo keda presentá den e sekshon aki lo wòrdu diseñá pa kada partisipante individualmente. E sekshon aki ta limitá, si bo ta interesá pa partisipá lo bo por tuma kontakto pa mas informashon na 560-5050.

Si bo ta interesá pa djòin Crazy Diamonds i selebrá bo por manda un email pa mas informashon na crazydiamondscuracao@gmail.com òf yama 516-7828 òf App na 562-7299.

Djasabra 30 di Yüli lo habri inskripshon pa karnaval 2017. Riba e dia aki por inskribí i tuma informashon personalmente, esaki ta tuma lugá nan Curaçao Zoo entre 11’or di mainta pa 4’or di atardi . Ban Selebrá Bida ku Crazy Diamonds den Karnaval 2017!