Minister Oduber conhuntamente cu Minister Bermudez a firma pa e ultimo inversion di FDA

Dialuna mainta Gobierno di Aruba a haci e anuncio oficial cu dentro di poco lo inicia cu e trabounan pa desaroya e proyecto di Embeyecemento y Mehoracion di Zeewijk / Cura Cabay Beach. Minister Otmar Oduber conhuntamente cu Minister Angel Bermudez a haci e acto oficial firmando e documentonan pa asina inicia cu e bunita proyecto aki.

Minister Oduber ta indica cu ya caba a haci cierto trabounan na e pier na Cura Cabay / Zeewijk pero a mira un necesidad basa riba e gran cantidad di piscadonan cu pa hopi aña ta eherce nan ofishi na e sitio aki. Ta un gran cantidad di piscadonan cu pa hopi aña no a ricibi e debido atencion cu awor por ta contento cu un proyecto hopi mas amplio unda e bario completo lo por disfruta di dje.

E mandatario ta comenta: “E piscadonan ta splica mi cu hopi biaha ora tin mal tempo cu ta pone cu lama tambe ta bira peligroso, hopi ta e botonan di nos isla cu ta bin mara den e area aki pa percura pa nan siguridad.” Esaki ta demostra tambe e importancia di e pier aki y cu mester di su debido atencion.

Minister Oduber a gradici su colega Minister Bermudez, y tambe Minister Benny Sevinger, e mandatario encarga cu infrastructura, cu a brinda sosten na e proyecto aki. “Hopi aña pasa nos como Gobierno a tuma e decision cu nos ta bay aloca fondonan di FDA, pa mehoracion di calidad di varios beachnan y areanan rond di lama. Zeewijk / Cura Cabay ta e ultimo di e serie aki despues cu a renoba Arashi y Nikki Beach, conhuntamente cu TPEF y ATA.”

E ta e ultimo pero no e menos importante, Zeewijk / Cura Cabay lo conoce un cambio grandi cu lo consisti di un inversion di 2.6 miyon florin. Ta trata di mehoracion y ampliacion di e pier pa e piscadonan, embeyecemento di henter e area y mehoracion di e beach. Esaki sigur ta pa e habitantenan por disfruta di un otro beach di bon calidad pero tambe pa crea mas opcion pa e gran cantidad di turistanan cu ta bishita nos specialmente cu barconan crucero.

“Esaki ta un di e areanan cu ta wordo crea banda di mas pariba tambe cu tur e desaroyonan tumando luga pa haci di San Nicolas e Capital di nos Herencia Cultural. Un plan cu a inicia for di 3 aña pasa pa atrae mas turista pa pariba di nos isla.”

Embeyecemento y mehoracion di Zeewijk/Cura Cabay Beach ta encera di un proyecto cu lo ta den dos etapa. E prome etapa ta pa crea facilidadnan unda pa prome biaha piscadonan lo por tin nan propio espacio pa warda nan ekiponan, lo amplia e pier y lo desaroya henter e area pa crea un centro di pesca unda benta por tuma luga na un forma mas adecuado pa henter e bario y henter nos isla. Minister Oduber ta termina bisando: “Zeewijk /Cura Cabay lo conta pa prome biaha cu un luga nos hendenan y nos bishitantenan lo por bin cumpra nan pisca pero tambe un luga cu facilidadnan pa nos piscadonan. Banda pabou un beach cu su facilidadnan pa tur su usuarionan. Intencion ta pa crea di e area aki algo cu no tin pariba ainda.”

Awor e piscadonan lo por tin un luga mas adecuado pa eherce nan ofishi y na mes momento trece pisca fresco pa nos hendenan y pa nos bishitantenan.