Tremendo presentashon di nos músikonan i intérpretenan den festival Un Kanto pa Kòrsou 2016.

Instituto pa Formashon Musikal ta sumamente satisfecho ku resultado di festival Un kanto pa Kòrsou 2016. E orkesta ku ta konsistí di nos mihó profeshonalnan musikal di Kòrsou a perkurá pa un kompañamentu musikal na nivel haltu, despues ku den apénas 7 ensayo i un ensayo general,   a práktika tur e areglonan di vários estilo i género.

Esaki ta un nota positivo na honor di e gran baluarte musikal dfm, Maestro Errol El Toro Colina. E kontenido di tur e 12 númeronan, a konsistí mensahenan profundo i positivo , ku ta mishi ku nos tur ku ta sinti nos mes ,Un bon yu di Korsou.

Tur intérprete, a demostrá nan arte di kanto, di un forma ekselente i esaki no a hasi e trabou pa e kuerpo di hurado fásil. Nos ta kontentu ku esnan ku no por a presensia e festival personalmente, por a gosa di tremendo transmishonnan di radio Mas i TCFM, ya ku durante konferensha di prensa, nos a bisa bon kla, ku no tin  eksklusividat, i tur emisora por transmití.

Tele Curaçao a transmití tur e nuebe edishonnan di e festival Un kanto pa Kòrsou, i a hasi esaki tambe di un forma ekselente. Un gradisimentu ta bai pa gobièrnu di Kòrsou, e spònser di mas grandi di e magno evento aki. Un danki spesial tambe na Multi Post, Wimpys Sound and Image, Licores Maduro, Coca Cola,Radio Direkt, Restaurant Fuoco  i TeleCuracao. Un kanto pa Kòrsou  a demostrá ku  e tei pa keda, pero mester di mas sosten finansiero di komersio, pa por  duna mas realse na presentashon di e festival. Pabien na Eldridson Ogenia, pa un tremendo komposishon, i pa e hecho ku ela logra e titulo máksimo  na 5 okashon.

Pabien tambe na e dos hóben intérpretenan,  Deveana Lopez i Deborah Gomez, interpretando, e piesa, Ban desaroyá, di un forma maestral. Pabien  na Gedion  Chandler, ku durante 2 aña konsekutivo a skibi e areglo ganadó. Finalmente danki na prensa en general i pueblo di Kòrsou.