WILLEMSTAD— E programa di Akshon Desaroyo di Hubentut a organisá riba djaweps 16 di yüni un asina yamá ‘Dialogo den Bario’. E inisiativa a sali for di e intenshon pa organisá un proyekto piloto Tim Sosial di Bario pa hóbennan den e barionan di Kustbatterij, Koraalspecht, Marie Pampus i Nieuw Nederland. Den e Sentro di Desaroyo Marie Pampun i Nieuw Nederland mas ku 60 persona a hiba kombersashon ku otro. Minister di Desaroyo Sosial, Labor i Bienestar, Ruthmilda Larmonie, a skucha tur e deseonan di hóbennan ku hopi interes i a partisipá aktivamente. Hóbennan a kompartí nan deseo pa embolbí nan mas den aktividat di bario, pa krea mas aktividat pa mucha muhé i e tambe tur e soño personal ku nan tin.
Na 2015, Plataforma Nashonal Desaroyo di Hubentut a kombersá ku mas di 600 hóben durante e Diálogo Nashonal Desaroyo di Hubentut riba entre otro nan ambiente di bida. A base di e input aki a formulá un Programa di Akshon Desaroyo di Hubentut ku ta inkorporá e deseo di hóbennan mes den proyektonan konkreto pa logro desaroyo pa nos hubentut. Den e area di enfóke Bibienda i Ambiente di Bida, a bini dilanti ku hóbennan kasi no tin un laso ku e bario ku nan ta biba aden i ku nan ta sinti ku no tin nada di hasi i no tin nuin kaminda ku nan por bai pa papia di nan preokupashonnan. Base riba esaki a bini ku e proposishon pa lanta un Tim sosial di bario pa hóbennan kaminda tin profeshonalnan di diferente organisashon ku ta bira e punto di kontakto pa hóbennan i ku por tuma akshon lihé. E metodo aki ya ta ser apliká na diferente kaminda na mundu, pero tambe lokal, na Fleur de Marie.
En preparashon pa e diálogo den bario di djaweps pasá a tene un seminario di konosementu riba 18 di mart riba e tópiko Tim Sosial di Bario. A papia ku ekspertonan riba e tereno di desaroyo di bario, di nan eksperenshanan i e ‘benchmark’ ku otro país. For di e seminario a sali un konsepto di kon un Tim Sosial di Bario lo mester funshoná na Kòrsou. Tambe a akordá ku e grupo di ekspertonan aki ku lo forma un “Community of practice” i lo interkambia regular. Durante e último simannan tambe tabatin diferente entrevista di enfóke ku mas ku 50 hóben. E entrevistanan aki tin komo meta pa haña un mihó bista di e nesesidat serka hóbennan pa ser skuchá. Esaki relashoná ku temanan ku ta importante pa nan, pero tambe pa siña di nan propio bista di kon nan kier ta embolbí i e mihó maneranan pa komuniká ku nan.
Durante e Diálogo den Bario a presentá e resultadonan di e kombersashonan ku a hiba i a sinta hobennan i ekspertonan huntu na mesa e biaha aki pa interkambiá. Minister Larmonie a duna di konosé ku e ta apoya e manera aki di traha i trese hende huntu. Ela anunsiá ku lo inisiá un trayektoria di drecha e kasnan i e sentro di bario di Kustbatterij. E proyekto piloto Tim Sosial di Bario lo komplementá esaki. Oasis Caribe Movement bou di liderazgo di Kurt Schoop i Banco di Caribe tambe lo traha e proksimo 3 lunanan intensivamente pa konkretisá e idea i soñonan di e habitantenan. E proyekto piloto Tim Sosial di Bario ku enfóke riba hóbennan lo kuminsa den di dos mitar di aña i lo ser ehekutá durante 2 aña bou di ouspisio di Plataforma Nashonal Desaroyo di Hubentut.
Pa mas information tuma kontakto ku Deva-Dee Siliee na info@desaroyodihubentut.cw.