Pa selebrá esaki CAP i MCB huntu a hasi donashon di ANG 10.000 pa Maduro School
Willemstad – Curaçao Airport Partners i MCB Bank a firma un akuerdo di finansa pa e montante 82 Mion Florin, kual CAP lo usa pa finansiá e proyekto di ekspanshon di aeropuerto di Kòrsou. Durante e selebrashon di 100 aña MCB Bank na nan ofisina situá na Curaçao International Airport, CEO di CAP Ralph Blanchard i Managing Director di MCB Bank Michael de Sola a firma e kontrato, ku atrobe ta marka un momentu importante pa e trabounan di konstrukshon na aeropuerto. Alabes, pa demonstrá nan kompromiso pa bienestar di komunidat, Curaçao Airport Partners i MCB Bank huntu a hasi un donashon di ANG10.000 na skol básiko Maduro School.
Ta promé bia ku CAP NV ta finansiá un di su proyektonan por kompletu pa medio di un lening lokal. Normalmente bestür di kompania privá Curaçao Airport Partners NV ku parsialmente ta un entidat internashonal ku representantenan den Hunta di Komisario di CAP di CCR Brasil, Zurich Airport i Janssen de Jongh, ta kombiná lening lokal ku lening di bankonan internashonal renombrá i mas konosí pa nan. Gerensha di CAP a logra konvensé e Hunta di komisario di CAP ku finansiamentu lokal por kompletu tambe ta posibel pa medio di MCB Bank i alabes mas faborabel. Un akontesimentu úniko pues, ku a ser selebrá durante e evento MCB Centennial na e ofisina di MCB na aeropuerto di Kòrsou.
Donashon
Despues di e momentu ofishal kaminda a firma e akuerdo di finansa, CEO di CAP Ralph Blanchard i Manager di ofisina di MCB Miosotis Sleur a ofresé direktor i alumnonan di skol básiko Maduro School na Santa Maria (serka di aeropuerto) un chèk di ANG10.000 florin pa material i inovashon na e skol. “Di parti di gerensha di Maduro & Curiel’s Bank i Cuiraçao Airport Partners, nos kier hasi un donashon speshalmente pa invertí den material pa yuda C.M.L. Maduro School desaroyá riba tereno teknológiko, paso nos alumnonan di aweta nos futuro di mañan”, Branch Manager Miosotis Sleur a splika durante su spich. Ku baile i kanto alumnonan di Maduro School a gradisí CAP i MCB Bank pa e donashon, ku pa ámbos kompania ta un gesto pa demonstrá nan kompromiso na komunidat di Kòrsou.
Proyekto di Ekspanshon Aeropuerto
Den aña 2003 Curaçao Airport Partners NV (CAP) a firma e akuerdo DOMA (Development, Operation and Maintenance Agreement) pa manehá i operá aeropuerto di Kòrsou. Un di e palabrashonnan den DOMA ta pa CAP kuminsa planiá i realisá e diseño pa ekspanshon di e terminal na aeropuerto, na momentu ku e kantidat yega na 1.8 mion biahero pa aña. Den 2015 e kantidat di biahero a yega na 1.7 mion i CAP ta premirá ku pa fin di 2018, ora e trabounan di konstrukshon ta na su final, e kantidat lo a yega 1.8 mion.
Ku esaki na mente CAP a kuminsa planiá i traha riba e diseño, i ta hasiendo esaki 2 aña promé ku a ser stipulá den DOMA. Ku e ekspanshon na aeropuerto CAP lo por akaprá aproksimadament 2.5 mion biahero, i tambe efisientemente lo akomodá e futuro demanda pa kapasidat di e aeroliñan. Tambe den e plan di ekspanshon a inkorporá servisionan i fasilidatnan komersial pa elevá e eksperensha di e biahero na Curaçao International Airport.
Maduro & Curiel’s Bank NV, ku e aña aki ta selebrá 100 aña ofresiendo servisio na Kòrsou i Internashonal, ta konvensí di e importansha di e proyekto di ekspanshon di aeropuerto pa komunidat di Kòrsou, i tambe e impakto ekonómiko ku esaki lo tin pa nos komunidat, a ekspresá su konfiansa den CAP i Kòrsou, dor di proveé finansiamentu di Airport Expansion Project.