WILLEMSTAD – 14 di yüni 2016 – Ofisina di Turismo di Kòrsou (CTB) ta anunsiá ku despues di un trayekto di evaluashon, Coridja Stars Productions a keda enkargá ku organisashon di e sertámen lokal i preparashon di nos representante pa e sertámen máksimo di beyesa Miss Universo.

E kontrato previo ku Coridja Stars Productions a terminá na fin di aña pasá pa kual motibu a habri e oportunidat pa asina tur organisashon ku ta kumpli ku e rekerimentunan por a apliká pa bini na remarke pa organisá e sertámen di Miss Kòrsou. Despues di un proseso di evaluashon Coridja Stars Productions a keda selekshoná pa ehekutá e sertámen Miss Kòrsou 2016 i 2017.

Ta fresku den nos memoria e gran papel ku nos Miss Kòrsou 2015, srta. Kanisha Sluis a hasi na Miss Universo 2015, ku apoyo di nos komunidat nos ta bai pa un biaha mas pone Kòrsou su nòmber den tòp. Sigui e página ofisial di facebook di Miss Universe Curaçao: facebook.com/missuniversecuracao pa tur informashon i desaroyo.