Nieuwe Post NV, nos empresa postal inovativo ta organisá un seminario interesante dia 24 di òktober próksimo riba lo último riba tereno di transporte marítimo i ku avion i tambe e asina yama “ supply chain management.”   Durante di e seminario ku ta hiba di titulo “Improve your business with the lastest in logisitcs and supply chain management” ekspertonan internashonal lo duna presentashonnan interesante tokante trènt i desaroyonan interesante riba tereno di transporte marítimo i ku avion i kon komplementá e kadena di produkshon, almasenahe i transporte di produkto te na e kliente.  Algu ku sigur por benefisiá prinsipalmente komersiantenan den nan negoshi. Nieuwe Post a logra di atraé dos eksperto internashonal ku hopi konosementu i eksperensha riba e tereno aki pa por tene un presentashon durante di e seminario aki.  Ta trata di Sr. Antonio Barberena, kende ta doño i Presidente di ABForwarding, un kompania lider riba tereno transporte di karga den mundu i Sr. Glenn Tjon, kende ta partner regional den pa KPMG Sentro Amérika i Repúblika Dominikana.  Sr. Franklin Sluis, Direktor General di Nieuwe Post N.V. tambe lo komplementá e presentashonnan aki demonstrando kon nos na Kòrsou ta kla pa por hasi mihó uso di e desaroyonan aki den nos region i den mundu. E seminario lo ser apertura pa Minister enkargá ku Tráfiko, Transporte i Desaroyo Urbano Sr. Earl Balborda. Gerente General di Nieuwe Post NV ta bisa: “  Nos di Nieuwe Post ta mire komo nos deber pa kontribuí na amplia konosementu riba e tereno aki na komunidat di Kòrsou pero muy enpartikular nos empresarionan.  Kompartiendo e konosementu aki ku komunidat di Kòrsou nos ta spera di por fomentá mas kresementu pa negoshinan riba nos isla.  Komo empresa lider riba e tereno aki nos ta sinti nos yama pa duna un aporte.” E seminario ta tuma luga di djaweps 24 di Òktober próksimo den Tula Room di Sandton Kura Hulanda Hotèl & Spa.  Pa partisipá por registrá serka  Sra. Nereida Flores na telefon 433-1310 of Sra. Ydellienne Heerenveen na telefon  433-1307.  Por manda e-mail tambe na adrèsnan nflores@npostna.com i yheerenveen@npostna.com.