Brievengat brènch tambe a yama klientenan danki.

WILLEMSTAD –  Djaluna 16 di mei Maduro & Curiel’s Bank a kontinuá ku nan aktividatnan pa yama nan klientenan ku ta bishitá nan brènchnan danki pa nan sosten, lealtat i nan konfiansa. E di sinku aktividat na brènchnan den kuadro di MCB su rumbo pa 100 a tuma lugá na brènch di Brievengat ku tabata dekorá ala “back to the 80’s”. Parti p’aden di e brènch Bo Banko Amigu a sorpresá klientenan ku animashon di e propio empleadonan di e brènch i e famoso artista Gill Frans a drenta i kanta varios kansion di “80’s”. Tur kliente ku tabatei presente a haña e oportunidat pa gana un Kompa Leon Gift Card. Na total Bo Banko Amigu a regalá 5 Kompa Leon Gift Card na balor di NAf. 100,–. Tambe MCB a sorpresá tur kliente ku a bishitá brènch di Brievengat for di mainta te ora brènch a sera, ku un dushi trit i un bunita rekuerdo. Mas atardi entre 6.00 p.m. i 7.00 p.m., riba lugá di stashoná auto di Brievengat brènch tabatin presentashon di baile di koleganan di Brievengat brènch, presentashon di muchanan di Glorieux College, MCB Centennial Band i presentashon di Reinier Lijfrock i Liesje Lispier. Tur presente a gosa un bòl i naturalmente tabatin algu pa sisti e stoma i baha e set. Komo muestra di apresio i sosten na e área di brènch di Brievengat, empleadonan i e Brènch Manager di e brènch di Brievengat huntu ku miembronan di e tim di Maneho di Bo Banko Amigu a hasi entrega di un chèk na balor di NAf. 5.000,– na Glorieux College. Ku e donashon aki, MCB ta spera di por yuda maestronan i alumnonan di Glorieux College pa nan por logra konkretisá algun di e bunita proyektonan ku nan tin planiá p’e skol.

Keda pendiente pasó e luna aki tambe, dia 16 di yüni Bo Banko Amigu lo bolbe sorpresá klientenan di un di su 14 brènchnan.