Willemstad – 21 di òktober 2013 – E ministernan di Hustisia i di Desaroyo Ekonómiko, respektivamente señores Nelson Navarro i Stanley Palm, konhuntamente a tuma e desishon pa establesé un kuerpo polisial dediká na e sektor turístiko. E kuerpo aki lo yama POLITUR i lo kai hirargikamente bou di Kuerpo di Polis di Kòrsou. Aktornan den sektor turístiko a reakshoná kontentu riba e desishon aki. Riba 2 di ougùstùs 2013 Minister di Hustisia a nombra un Grupo di Trabou pa medio di un disposishon legal (Ministeriele Beschikking). E grupo di trabou aki ta konsistí di representantenan di Ministerio di Hustisia, Ofisina di Turismo di Kòrsou (CTB), CHATA, Kuerpo di Polis di Kòrsou i Servisio di Kòntròl i Seguridat (SKS). E grupo a risibí e enkargo pa hasi tur lokual ku ta nesesario pa instituí e kuerpo polisial POLITUR. Despues di estudionan amplio a yega na un plan di operashon pa ranka sali ku POLITUR riba e fecha ambisioso di promé di novèmber 2013. Segun presidente di e Grupo di Trabou POLITUR, señor Humphrey Josefa, e trabounan ta hopi pero ku esfuerso komun nos por a logra hopi. Djaweps 24 di òktober próksimo, lo tin un konferensha riba e inisiativa POLITUR. Den sala di konferensha na Renaissance Curaçao Resort & Casino lo ampliá riba e nesesidat, tareanan i propósito di POLITUR, e organisashon, struktura legal i tambe medionan i aporte nesesario. Pa e okashon aki a invitá interesadonan, organisashonnan i negoshantenan for di sektor turístiko pa tei presente i pa asina interkambiá di ideanan. Riba invitashon di e grupo di trabou lo bai tin dos eksperto di paisnan bisiña, Repúblika Dominikana i Colombia presente pa asina konta di nan eksperensha i interkambiá ku e invitadonan na e konferensha. Na e paisnan aki e sektor di turismo a krese barbaramente i  a mira e nesesidat pa instituí un kuerpo di polis pa protekshon dediká na turismo. General Justo Almilcar Fernandez, Director di POLITUR di Repúblika Dominikana, lo duna un presentashon di nan kuerpo i logronan. Pa Colombia e komandante i outoridat máksimo di polis enkargá ku protekshon di turismo nashonal, Mayor Juan Pablo Cubides Salazar, tambe lo mustra nan sistema di operá i prevenshon di kriminalidat den sektor turístiko. E tareanan di e kuerpo POLITUR lo ta pa duna asistensha na turistanan i mantenshon di órden i seguridat. Pero prinsipalmente e enfoke lo ta prevenshon di aktonan kastigabel. Ku táktikanan speshal di análisis di riesgo, rekomendashonnan pa komersiantenan òf eventonan, kòntròl i vigilansha mas rígido i dediká, den futuro POLITUR lo mustra su balor. E profeshonalnan asigná na e kuerpo POLITUR lo ta polis uniformá i armá ku preparashon di polis, segun nos leinan polisial ta preskribí. Ademas e profeshonalnan aki lo risibí training adishonal riba tereno di kon atendé ku turista i Kòrsou komo destinashon turístiko. POLITUR lo ta hopi visibel riba kayanan di Kòrsou. Ku e inisio aktual di e temporada haltu di bishitante na nos isla, e inisiativa aki a bini na bon momentu. Sigur konsiderando e kresementu den kantidat di bishitantenan i e importansha di e sektor di turismo komo pilar importante pa ekonomia di Kòrsou. E sektor aki ta bal e protekshon pa sigurá ku tur bishitante por sinti nan mes “safe” i pa Kòrsou bira i keda un destinashon sigur pa tur ku ta di bishita.