AHATA a manda carta pidiendo atencion di Gobierno y Parlamento, Investigacion preliminar ta adverti Gobierno di consecuencianan pa sector turistico!

ORANJESTAD, Aruba – 22 di mei 2016: “Nos kier haya e oportunidad pa por splica henter Conseho di Minister riba e proposicion riba mesa awor pa cambia e ley cu ta regula e permiso di operacion pa hotelnan”, asina Aruba Hotel and Tourism Association ta pidi Gobierno. Ta importante pa henter Gobierno ta bon informa di tur detaye y di e consecuencianan cu e ley aki lo por trece cune. A pidi pa topa den Conseho di Minister di diabierna ultimo, pero esey no a logra.

Tabata diahuebs atardi laat cu AHATA a manda un carta urgente pa Prome Minister mr. Mike Eman, cu copia pa tur otro miembro di Conseho di Minister y copia pa tur miembro di Parlamento. E Presidente y Chief Executive Officer (CEO) di AHATA, James Hepple, a skirbi den e carta di diahuebs ultimo, cu e ta convenci cu Minister Presidente Eman ta consciente di e debate durante e ultimo dos simannan relaciona cu e proposicion pa cambia e ley cu ta regula permiso di operacion di hotelnan. Meta di e ley ta pa regula y evita mas crecemento den e cantidad di cambernan cu hotelnan por bende a base di e formula “All Inclusive”. Hecho ta cu e discusion di e ultimo simannan a conduci na varios reunionnan, den cual AHATA a topa cu varios persona, incluyendo Parlamentarionan, den nan esfuerso pa busca mas informacion y pa purba compronde dicon e legislacion aki ta asina necesario.

E asociacion di hotel y turismo di nos pais a splica na mas di un ocasion cu un regulacion asina no ta necesario na e momento aki. E vision aki di AHATA ta sosteni pa e conclusionnan principal for di e rapport di PriceWaterhouseCoopers di Merca cu nan a prepara pa Aruba Tourism Authority (ATA) na aña 2015 titula “All Inclusive Analysis” y cual PWC mes a resumi como articulo # 6 den e documento titula “Synopsis: All Inclusive Hotels” cu nan a publica dia 26 di januari 2016. Den e articulo ta skirbi: “Regulation of all-inclusive resorts could trigger a disproportionate negative effect on Aruba’s reputation in the international lodging and investment community”. Ta bon pa bisa cu den e mesun rapport di 2015 di PWC, nan ta skirbi tambe “Considering the apparent broad footprint of the all-inclusive model in Aruba, combined with the momentum of customer preference, operators’ available investment funds, the expected entry of established traditional brands, it may be advisable to embrace the all-inclusive concept”.

Awor, teniendo na cuenta cu e mesun PWC den su rapport ta argumenta contra regulacion y tambe ta recomenda Aruba pa brasa e concepto di All-Inclusive, ta haci cu AHATA ta confundi cu Gobierno ta bisa cu ta uza e rapport aki como base pa sostene e proposicion pa haci cambio den e legislacion. Bisando esaki, si considera cu algun forma di regulacion ta necesario, AHATA a expresa cu generalmente nan ta di acuerdo cu algun forma di control riba futuro expansion di e segmento aki den e negoshi di hotelnan. Pero pa awor, AHATA ta recomenda Gobierno pospone tratamento di e ley pa por conduci estudionan substancial pa determina e miho accionnan pa logra un decision na miho interes di henter e sector turistico di nos pais. Claramente e estudionan existente ta mustra di ta inadecua pa hustifica e enfoke proponi y e peticion di AHATA awor ta pa colecta mas informacion posibel, cu lo permiti un analisis bon balansa, di tur sorto di consecuencianan cu introduccion di cualkier regulacion pa no haci daño na nos economia turistico, cu ta asina exitoso.

Aruba a cuminsa desaroya e industria turistico na final di decada 1950. Cu crecemento di e sector turistico, na september 1965 a funda Aruba Hotel Association y na 1987 a bira Aruba Hotel and Tourism Association (AHATA), cu awendia ta conta cu 90 compania miembro. Su miembresia ta varia for di hotelnan grandi, timeshare, operadornan di tours y companianan grandi y chikito den e sector. AHATA ta traha di cerca cu Aruba Tourism Authority y ta colabora tambe cu Camara di Comercio, ATIA, Asociacion di comerciantenan den caya grandi y cu San Nicolas Business Association. E rol primordial di AHATA ta pa proteha, dirigi y influencia e industria turistico di Aruba dor di sigura cu sector publico ta aloca fondonan di “Room Tax” den forma apropia, ta inverti e suma aki efectivamente y ta ehecuta plannan di mercadeo den forma corecto pa aumenta “rev-par” y e suma cu cada turista ta gasta ora ta di bishita riba nos isla.