Resientemente NOS kompania di televishon pagá, TDS, a kumpli 28 aña di eksistensia. Esaki ta un logro grandi pa un kompania lokal ku kada bes ta sigui traha pa brinda tur su klientenan un mihó servisio i alabes mustra ku e ta balorá kada un di su klientenan. No ta pòrnada ku ketu bai TDS ta E kompania di televishon pagá mas grandi aki na Kòrsou. Manera mayoria hende por kòrda, TDS a kuminsá na aña 1985 ku 4 kanal i awe, 28 aña despues, a krese ku nada ménos ku 200 kanal, inkluyendo kanalnan di emisoranan di radio i video lokal. TDS no kier a laga e aniversario aki bai sin hasi algu pa tur kliente, i p‘e motibu aki, TDS den estrecho koperashon ku Sr. Eligio Melfor, lo brinda e wikènt aki, 58 ora largu e promé edishon di Wikènt ku Eligio kompletamente GRÁTIS pa TUR su miembronan di tantu Kòrsou komo Boneiru. E produkshon aki lo kuminsá pasa djabièrnè 18 di Òktober pa 8:00pm i lo terminá djadumingu 20 di Òktober 2013 pa 11:59PM. Wikènt ku Eligio edishon 1, ta un seri ku a wòrdu estrená mas òf ménos 2 aña pasá ku un durashon di 2 ora. E edishon aki lo keda ripití su mes kada 2 ora kuminsando for di 8:00pm p’sina duna tur nos klientenan e oportunidat pa skohe ki ora nan kier gosa di e obra aki. Hari bo barika yen i gosa 2 ora largu di NOS komediante faborito aki na Kòrsou. TDS kier informá tambe, ku tur luna kuminsando den luna di Novèmber binidero, lo start atrobe ku wikènt ku Eligio ku komedianan nobo, pika i super humorístiko. Keda pendiente pa “Wan 3 Porta” ku lo wòrdu estrená den luna di Novèmber aki via di e sistema di Pay Per View. Pa e wikènt aki si, Wikènt ku Eligio lo ta kompletamente grátis pa TUR miembro di TDS. Pues sintonisá kanal 81 di BO TDS for di djabièrnè 18 di Òktober pa 08:00PM te ku djadumingu i gosa, dibertí i lubidá tur dolor di kabes, paso Don Eligio Melfor ta bai buta nos tur hari te lora abou. Wikènt ku Eligio tambe ta eksklusivamente riba TDS, Esun di NOS!