Carol Anjie y un invitado ta bay Olimpiada 2016

ORANJESTAD, 22 di Mei 2016 – Aruba: Aruba Bank Visa Credit Card a ofrece su clientenan un experiencia inolvidabel, “The experience of a lifetime”. E cliente ganado, Carol Anjie, a ricibi diabierna ultimo for di Aruba Bank un bunita vakantie pa Rio de Janeiro,  Brazil. E biahe ta programa pa tuma luga hustamente durante di e temporada di Olimpiada 2016, unda cu Carol Anjie y su invitado lo disfruta di e experiencia unico di bishita Weganan Olimpico 2016.

Visa International ta e “credit card” y e sistema di pago oficial di Rio 2016. A invita tur cliente di Aruba Bank Visa Credit Card pa participa na e campaña. Pa cada $400 cu e cliente a “swipe” riba su Credit Card Visa Classic, Visa Gold y/of Visa Platinum entre dia 8 di maart te cu dia 8 di mei 2016, e cliente a keda registra pa participa den e sorteo.

Carol Anjie a ricibi su pakete completo p’e y su invitado, cu a inclui dos pasashi ida y buelta pa Rio de Janeiro, estadia na un hotel luhoso cu desayuno inclui, entradanan pre selecciona pa diferente evento Olimpico, recorido di e ciudad di Rio, transporte y un visa card prepago di $300. Ademas, Visa a percura pa un persona di contacto multilingual como guia pa Carol y su invitado y nan lo ricibi algun mercancia promocional di Visa y Olimpiada como regalo.

Aruba Bank ta desea Carol Anjie y su invitado un biahe placentero y un bunita experiencia.