Recientemente Fundacion pa Hende Muhe den Dificultad (FHMD) a tene un conferencia di prensa pa, por medio di prensa, informa pueblo di Aruba tocante e grandioso fiesta di LUAU cu nan ta bai tene riba 25 di juni venidero. Den un Parke Arawa bunita decora, cual por cierto ta caminda e fiesta lo tuma lugar, prensa a hanja un toke y sabor di loke ta bai ta e tremendo fiesta aki, cu lo sirbi como fundraising pa e fundacion. Presidente di e fundacion, Sra. Suzy Kock, a habri e conferencia jamando prensa bon bini y a Introduci e coordinadora nobo di e fundacion, Sra. Magaly Maduro, cu ta encarga cu e funcionamento diario di e kantoor y shelter di e fundacion.

Sra. Kock a sigui na splica e motibo pa cual FHMD ta teniendo e fiesta aki, cual motibo ta cu e fundacion mester di fondo pa sigui cu e trabao valioso cu nan ta bin ta haciendo pa e comunidad Arubiano ja pa mas di 20 aña caba. Manera nos tur sa, subsidio na fundacionan a wordo corta door di gobierno y awor mas cu nunca FHMD ta depende di e generosidad di comunidad pa sigui cu su trabao.

Sra. Kock a pasa palabra pa Sra. Yvonne Spellen, presidente saliente y alabes vicepresidente nobo di FHMD, cu a splica un poco di e trabao di e fundacion pa duna sosten na e hende muhe den nos comunidad. E no ta un tarea facil manera Sra. Spelle ta splica, ya cu nos tur sa cu tin hopi decadencia di moralidad y responsabilidad den nos comunidad Arubano y cu sin e normanan di respet no solamente nos famia, pero tambe nos sociedad en totalidad lo sigui experencia e consequencianan negativo cu nos ta wak ya caba awendia. Pero Sra. Spellen a splica cu FHMD tin un team capacita y motiva cu ta traha incansablemente pa drecha e situacion di hende muhe, nan yiunan y nan famia y pa trece e respet back pa cada individuo. FHMD ta hasi esaki door di, entre otro, duna informacion al caso na publico en general y na esnan cu ta acerca e fundacion, educa hende muhe, hende hombernan y hobennan ariba e topico di abuso domestico, duna guia na hende muhe pa yega na diferente instancianan cu por juda nan, duna shelter na hende muhe y su yiunan ora nan ta victima di abuso domestico y asina hopi mas.

Sra. Spellen a enfatisa cu e fundraising aki ta di suma importancia pa FHMD por keda hasi nan trabao pa nos comunidad. Consecuentemente e fundacion ta spera cu e pueblo di Aruba lo sa di sostene e fundacion.

Siguientemente a hiba palabra, Sra. Vanessa Quilotte, secretaria di FHMD, cu a conta kiko esnan cu lo assisti na e fiesta espectacular dia 25 di juni por spera.

E fiesta ta den e tema di “Hawaiian Luau” y esaki lo keda refleha di cuminsamento te final di e anochi, for di e bunita decoracion tropical, pa e vestuario cu toke Luau, pa e cash “Tiki Bar” cu lo tin su signature tropical cocktails specialmente pa e Luau, te cu e “Hula Food Corner” cu lo tin platonan chiquito pa bende cu lo tin un toke tropical masha dushi mes y no lubida tambe e highlight di e anochi, cual lo bai ta un “Luau Roast Pig”, cu lo wordo hasi na e fiesta mes riba candela, na estilo Hawaiiano. E lo ta un espectaculo riba su mes pa mira y purba, dus niun hende por perde esaki.  Parti di e ganashi di e bar y cushina lo bai pa e fundacion tambe.  Verder lo tin tambe suprise acts durante e anochi, un “Coco Loco Drink Spot”, photo op moments caminda hende por saca potret y muchu mas. Dus e lo ta un anochi diferente, exitante y fabuloso cu tur hende lo ta papiando di dje despues. Dus wak pa bo no keda afor!

Sra. Quilotte tabata hopi contento di por introduci señor Mitch Almary di Tsunami, cu lo ta e banda cu lo anima e fiesta y pone tur hende riba pista henter anochi. Sr. Almary a bisa cu en berdad Tsunami ta bon prepara pa pone ambiente na e fiesta di FHMD y cu nan ta invita henter e pueblo di Aruba y e fanaticada di Tsunami pa cumpra nan kaarchi pa asina no solamente sostene e bon causanan di FHMD, pero tambe pa nan pasa un tremendo anochi dia 25 di juni. Na turno tabata Sra. Marisella Bronswinkel, miembro di Directiva di FHMD cu a informa cu kaarchinan pa e fiesta ja ta na benta y ta obtenibel cerca cada miembro di e directiva y tambe na Sero Blanco Service Station. Si mester special delivery di kaarchi na cas of na lugar di trabao, por jama FHMD na number 583-5400 of tambe e presidente, Sra. Suzy Kock na 593-0330. Un kaarchi ta costa solamente USD 100 pa 2 persona, cual ta un super bon prijs pa un fiesta bailabel cu Tsunami y cu tur e ambiente tropical y tokenan special cu ta bai tin. Por ultimo Sra. Bronswinkel a papia di e vestuario pa e anochi Luau, cual tin como dress code: Luau Casual Elegance. Sra. Bronswinkel  a splica cu e dress code tropical no ta obligatorio, pero cu lo ta hopi great si por bin bisti cu un toke tropical. Esnan cu kier add un touch festivo y tropical seguramente por hanja un bunita paña of accessorio na Trash by Ronchi, cu den e dianan siguiente lo bai post potretnan cu ideanan pa un vestuario a la Luau riba nan Facebook page. Fundacion tambe lo post ideanan riba nan Facebook page, dus seguramente tur hende lo por wak algo cu lo inspira nan vestuario pa e anochi.