Willemstad – Maduro & Curiel’s Bank den kuadro di su selebrashon rumbo pa 100 aña por wak atras riba un eksitoso partisipashon na temporada di Seú. No solamente durante di Festival di Kantadó Mayó ku e aña aki a bai Scharloo Kade, pero tambe na tur e diferente aktividatnan manera maramentu di lensu i tambe elekshon di wela i reina seú.  MCB tambe a partisipá ku un grupo di 150 kolega na Marcha Grandi di Seú i di un manera hopi spesial den ambiente kultural a yama danki pa 100 aña ku e ta gosa di e konfiansa di komunidat di Kòrsou.

E grupo di seú di MCB ku yama “MCB, Kosecha di un simia bon sembrá”, a partisipá ku e tema “Jasmin, E Reina di Flornan”. For di prinsipio e grupo di MCB a indiká ku nan lo no partisipá pa premio pero lo hasi algu distinto pa kontribuí na nos kultura. Tur kolega di grupo a kontribu’i ku un pi’e shen i na final di e temporada a skohe algun instansia ku ta risibí un donashon. Total e koleganan a rekoudá e montante di 11 mil florin. E 4 organisashonnan ku a skohe ta traha na bienestar di agrikultura i krio di bestia i kada un a risibí un donashon di NAf. 2750,-.

Kooperativa agragrio Hato. E kooperativa di kunukero aki tin mas ku 30 sosio. Ta trata aki di kunukeronan penshonado i sin trabou ku ta planta pa bende na supermerkado, toko i individual. Nan ta dependé di solamente e entrada aki. Ademas nan sa hasi donashon di fruta i berdura (loke nan no por a bende) na diferente kas di grandi, afkickcentrum, krèsh etc etc

Fundashon Jahdisi ta un fundashon ku ta duna kurso i organisá diferente evento pa yuda kunukero i kriadó di bestia haña mas i miho konosementu riba e tereno aki. Paso un kununku i krio salú ta garantia pa bon salú di e konsumidó di Kòrsou.

Kooperativa Kria Tur ta un koperativa di kriadónan di bestia ku tambe ta traha riba kapasitashon di su 37 miembronan i nan ta traha konhuntamente ku sentro di bario Ser’i Papaya pa kuminsá ku edukashon agrario pa mucha i hoben.

Kooperativa Agrario Banda Ariba (KOABA) ta un kooperativa di kunukero di Bandariba (Fuik i besindario). Nan ta promové plantamentu i duna kurso na nan miembronan. Nan ta para pa mas i mihó produkshon lokal di alimento.

“MCB, Kosecha di un simia bon sembrá”, di e forma aki ta klousurá e dushi temporada di seú i ta yama danki na gerensia di MCB, tur kolega di Korsou, Bonaire i St. Maarten i komunidat di Kòrsou.