Un enfermera cu ta briya un positivismo cu ta contagia

ORANJESTAD, Aruba – 16 di mei 2016: Dr. Horacio E. Oduber Hospital a scoge Dia di Enfermeria pa anuncia su Empleado di Luna di mei 2016 cu alabes ta un ‘verpleegkundige’. Sr. Andie Phillip, kende ta zorgmanager di e departamento “Snijdend 4” a expresa cu su team ta orguyoso cu a nombra un di nan coleganan, esta Nelmirsa Oduber, como Empleado di Luna y cu esaki ta dobel celebracion pa nan ya cu ta sosode riba nan dia special.

Hustamente riba e dia cu ta celebra e establecimento di e profesion di enfermeria y ta conmemora e bida di e prome nurse, esta Florence Nightingale a scoge un enfermero moderno, kende tambe ta esun cu ta vigila e calidad den su departamento y ta e motor tras di introduccion di varios elemento di innovacion riba e seccion aki como empleado di luna, sr. Phillip a expresa. Nelmirsa sigur ta tipifica e imagen di “Florence Nightingale”; no tabatin miho persona pa scoge pa e titulo aki, el a agrega, esaki ta un empuhe tambe pa otronan sigui desaroya nan mes mas.

Nelmirsa Oduber ta tipifica e sorto di persona cu Florence Nightingale tabata, door di ta accesibel pa su pashentnan, cariñoso, y hopi dedica na su pashentnan. Sr. Phillip a finalisa bisando cu Nelmirsa ta un persona serio den su trabao, y nunca el a wak e bin trabao rabia. E ta briya un positivismo cu ta contagia colega y hasta pashent.

Nelmirsa Oduber tin seis aña trahando na Dr.  Horacio E. Oduber Hospitaal y a traha den diferente departamento. El a keda hopi sorprendi y emociona cu e honor cu e tabata nomina y a gana. El a remarca cu riba e departamento cu e ta trahando actualmente e ta mira diferente operacion tur dia y ta gusta cu e ta siña hopi cos. E experiencia ta diferente tur dia. Sra. Oduber ta conta cu tin cosnan bon y menos bon ta pasa tur dia y e ta keda mas satisfecho y contento di mira e pashentnan contento y ora nan ta bira y sinti miho y por bay cas.

El a comenta cu e no a spera e reconocimento, cu ta muestra cu su coleganan ta balora e trabao cu e ta haci hunto cu nan; un reconocimento asina ta dun’e mas gana di sigui traha, sigui siña hunto cu su coleganan, y na bienestar di nan pashentnan.

Pashentnan ta delicado y dedicacion y profesionalismo mester ta semper primordial.

Pabien !