Subway ta partner den biba saludabel pa “Walk & Run 2016 – Always Forward”
ORANJESTAD, Aruba – 16 di mei 2016: Aruba Bank ta masha contento di anuncia cu e aña aki atrobe lo organisa su caminata y coremento, conoci como nan evento di “Walk & Run”, cu ta cuminsa diamars 31 di mei, y sigi diaranson 1 di juni, diahuebs 2 di juni y ta culmina diabierna dia 3 di juni 2016 den 4 diferente districto. E slogan di e aña aki ta “Always Forward”.
“Always Forward” ta indica, cu no ta importa si bo ta cana of core, e mas importante ta pa semper sigi move padilanti! E palabranan “Always Forward” ta aplicabel na bida en general, enfocando ariba nos metanan y esfuersonan cu nos ta pone pa nos mes durante di nos bida. Pesey mes corda semper “Always Forward”.
Aruba Bank ta masha contento cu ta 12 aña caba cu ta organisa e evento cu ta promove salud, y cu a bira un parti escencial di nan programa social anual. Ta importante pa menciona tambe cu Subway un biaha mas ta uni na e evento, presentando su opcionnan saludabel di cuminda. Nan tambe ta sostene e tema, e iniciativa y sigur tambe representando bida saludabel.
Aruba Bank hunto cu IBISA y Cuerpo Policial Aruba a delibera riba e 4 rutanan, di cual por menciona cu 2 ta rutanan nobo. E prome dia lo sali y termina na e Aruba Bank Drive Thru Center na Paradera, e biaha aki lo tuma un otro ruta y e di 2 dia lo sali y termina na Fisherman’s Huts, cual tambe ta un ruta nobo e aña aki.
Siguridad ta hopi importante, mirando e cantidad di hende cu ta participa. Conhuntamente cu Polis y grupo di boluntarionan lo yuda pa garantisa siguridad maximo riba e rutanan.
Registracion ta habri desde dialuna 16 di mei via walk-and-run@arubabank.com. Registracion ta individual. Bo por registra pa cana, pa coredo of cana/core (indicando cu bo ta core pero mas tanto pa train y recrea, no necesariamente pa competi).
Ta conseha tur hende pa asina registra, paga mesora, pa asina garantisa bo luga. E aña aki por paga online via Aruba Bank Online (ABO), uzando e feature di “Bill Payment” den e drop-down, por scoge “Aruba Bank Walk & Run 2016″. Esaki ta solamente pa clientenan di Aruba Bank. Otri participantenan cu no tin ABO, por paga na IBISA su oficia na Frankrijkstraat of San Nicolas, usando e machin di swipe di Aruba Bank, of por paga cu cash. Inscripcion y partimento di size di shirts ta bay a base di “first come first serve”.
Tur participante ta ricibi 1 dri-fit shirt, un visor (pechi) y un chip. Ta corda tur hende pa registra na tempo pa evita cu na ultimo momento ta busca luga pa participa, ora cu tur cupo ta yen caba.
Lo tin premio CASH pa coredo, top 5 femenino y top 5 masculino. Tambe e top 3 den cada categoria lo ricibi un medaya. Sigui Aruba Bank ariba Facebook, pa keda informa cu tur detayes di e gran evento annual aki, Aruba Bank Walk & Run 2016.