WILLEMSTAD.- djawuebs atardi ‘Instituto pa Formashon Musikal’ a tene un rueda di prensa pa anunsiá e di 9 edishon di e festival “Un Kanto pa Kòrsou”. Festival “Un Kanto pa Kòrsou” lo tuma lugá djarason, 15 di yüni 2016 na WTC.

INSKRIPSHON

Inskripshon a habri, 13 di mei 2016 i ta sera otro siman djabièrnè, 20 di mei pa 5’or di atardi. E komishon lo reuní djadumingu, 22 di mei durante dia pa tuma e desishon final ken lo por bai partisipá definitivamente na e festival. Djamars, 24 di mei lo anunsiá e lista definitivo di partisipante.

KARCHI ENTRADA

Gobièrnu di Kòrsou a opta pa tene e preis di entrada mas abou posibel i pa e motibu ei tambe Gobièrnu a duna un aporte finansiero. Pa e festival di e magnitut aki ku nos mihó intérpretenan i nos kompositornan, kompañá pa nos orkesta nashonal, esnan interesá ta pasa solamente 35 florin pa persona i 45 florin na porta. Karchinan ta optenibel na ’24 uur uit de muur’, Boekhandel Samson i na Festival Center.

Sra. viuda Adisona Colina Gomes. DEDIKASHON FESTIVAL

Den pasado e festival UKPK a keda dediká na: 2008 George Willems dfm; 2009 Tobias ‘Tobby’ Lampe; 2010 Mafalda Minguel; 2011 Greta Martha dfm; 2012 Ced Ride; 2013 Rudy Plaate; 2014 Alejandro ‘Jandi’ Frans dfm i 2015 Rignald Vidal. Despues di konsultá ku famia, e komishon organisadó a yega na e desishon ku ta dediká Festival “Un Kanto pa Kòrsou” 2016 na Maestro Errol “El Toro” Colina dfm.