Djabièrnè i djasabra último un tim di miembronan di Brantwer, Kuerpo Polisial Kòrsou (KPC), VKC i tambe èks studiantenan di Sint Fransiscus College a duna un man na nos Zoológiko Nashonal.

E inisiativa

Algun siman pasá un miembro di KPC señor W. Schoop a bin Curaçao Zoo pa hasi trabou boluntario huntu ku miembronan di su famia i a mira e nesesidat grandi ku tin pa mantenshon di entre otro palunan. Señor W. Schoop a mobilisá mesora i ku koperashon di mando di KPC i departamentu di Komunikashon i Prevenshon a aserka Brantwer, VKC i tambe èks alumnonan di Sint Fransiscus College pa a bin yuda. A mobilisá kran, zag i tur ekipo profeshonal pa por a logra un trabou tremendo.

E trabounan

E trabou di limpiesa i saniamentu di nos vegetashon tabata na promé lugá pa seguridat i protekshon  di nos bestianan i sigur pa nos bishitantenan. E trabounan ehersé dor di Brantwer, Kuerpo Polisial i tur e otro personanan ku tabata tei presente sigur lo yuda ku progreso i lo yuda drecha e ambiente pa nos animalnan i pa e futuro vegetashon ku tin ku yena e parke botániko ku a wòrdu fundá for di periodo di segunda guera mundial (1942).

Gradesimentu

Curaçao Zoo sigur ta sumamente gradesí ku tur e miembronan di Kuerpo Polisial ku no únikamente sa di sirbi i protehá sino tambe sa di duna un man na proyektonan karitativo manera esaki; palabra no ta sufisiente pa gradesí e miembronan di Brantwer ku durante dos dia a hasi un trabou eksepshonal i impagabel. Danki tambe na VKC i e èks alumnonan di Sint Fransiscus College. Danki pa boso tur su aporte! Nos ta yama danki tambe na representante di ROP ku tambe tabata presente pa kontrolá ku tur trabou ta wòrdu hasi segun regla.

E plan maestro

Den luna di yüni próksimo lo presentá e plan maestro ku sifranan pa pueblo kompleto p’asina un i tur por mira tur e trabou bunita di kurason ku a hasi durante e último kuater añanan i nos tin sigur ku komunidat kompleto lo sa di saka un man i sostené loke ta di nos tur.