Aruba cu ta depende completamente riba e industria di turismo como nos unico pilar economico actual, mester ta hopi cauteloso na momento di scoge e direccion cu nos kier bay cu e sector aki. Ganashi pa e pais ta keda determina pa e cantidad di placa laga atras pa cada turista. Tin varios costonan scondi pa locual ta trata e industria di turismo. Minister Otmar Oduber proximamente lo ta den Parlamento di Aruba pa trata un ley pa frena un inventario adicional di cambernan den e contexto di All-inclusive. E minister ta indica cu un balansa adecuado den e tipo di acomodacionnan na Aruba ta un prioridad y e cantidad di acomodacionnan all-inclusive mester por keda den e margennan aceptabel, den e caso aki e ley ta papia di un maximo di 40 % compara cu e averahe den Caribe di casi 80%. Na e momentonan aki Aruba ta conta cu un inventario di All-inclusive un averahe ta 32%. E tema di All-inclusive y su impacto negativo riba economia di un pais ta un discusion cu na mas pais ta topico di dia. Recientemente riba e pagina web di UNEP, United Nations Environmental Programme, a publica un articulo “Negative Economic Impactof Tourism” cu ta elabora extensamente riba e tema di All-inclusive y e impacto negativo cu esaki tin riba economia di e paisnan. Na Thailandia a conduci un investigacion y a conclui cu mas di 70% di e placa gasta di e turistanan ta sali for di e pais, via companianan di agencianan di biahe internacional, aerolineanan internacional, hotelnan, cuminda y bebidanan importa etc. E placa no ta bay na negoshinan local ni na e empleadonan den por ehempel no por haya tips na e hotelnan di All-inclusive. E porcentahe di placa gasta di un turista cu ta sali for di e pais di e turistanan cu ta scoge pa keda na un acomodacion All-inclusive ta varia na cada pais y por ehempel pa locual ta trata islanan den Caribe e porcentahe ta calcula na un 80%  y na India esaki ta 40%. De facto di cada $100 cu un turista ta gasta ora di cumpra e tipo di vacacion cu ta inclui un acomodacion All-inclusive y ta cumpra esaki den un pakete, ta solamente $5 ta keda den economia di e pais. den e mesun articulo ta menciona tambe OAS, Organization of American States, a conduci un encuesta riba e industria turistico di Jamaica pa asina mira di cerca e rol di acomodacionnan All-inclusive compara cu otro tipo di acomodacionnan.  E resultado ta indica cu Hotelnan All-inclusive ta genera un ganashi mas grandi pero e impacto economico pa e isla ta mas abou pa cada dollar compara cu otro tipo acomodacion. Negoshinan local mayoria biaha ta mira nan oportunidad pa genera un entrada reduci severamente na momento cu crea paketenan vacacional, cu ta inclui acomodacion All-inclusive. E turista keda den nan resort cu ta provee nan cu tur locual nan tin mester. Tur esaki ta puntonan cu por tuma na cuenta cu ne na momento di tuma un decision den cual rubo nos como pais Aruba lo kier bai.