Willemstad (10 di Mei, 2016) – Entrevista kondusí ku Curaçao Culinary Team Bartender 2016, Fabian Cleopa (24). Fabian ta un dje hobennan ku ta forma parti di e delegashon di 6 hoben talentoso ku lo bai representá Kòrsou na Taste of the Caribbean den Yüni proksimo na Miami.

-Kuantu tempu bo tin ta ehersé e trabou di bartender?

Fabian: Mi tin 2 aña trahando komo bartender. Na total mi tin 4 aña trahando den e sektor di hospitality. Prome ku m’a disidi di focus riba bartender mi tabata waiter pa Mise en Place, Marriott I Zest. Aworaki mi tin un trabou part-time komo bartender na Baoase.

-Kiko mas bo ta gusta di bo profeshon?

Fabian: E parti di duna servisio semper tabata den mi. Mi ta un hende servisial i ta haña satisfakshon dor di hasi un kliente felis.

-Kiko ta bo meta(nan) pa ku futuro?

Fabian: Mi meta primeramente ta pa kue minimal un medaya di oro n’e kompetenisa di Taste of the Caribbean proksimo. Riba termino largu lo mi ke tin mi propio restorant of un kompania ku ta organisá evento.

-Bo ta hasiendo un studio aktualmente?

Fabian: Si, mi ta hasiendo mi pre-bachelor aworaki preparando pa aña eskolar benidero mi start ku Hospitality Management na ICUC pa mi ta mas mihó prepará pa sigui traha den e sektor di hospitality.

-Kiko b’a siña di bo koleganan dje tim Kulinario 2016?

Fabian: Bo ta siña traha den tim i dil ku kritika konstruktivo. E tim ta hopi flèksibel i tur hende ta pará kla pa yuda. Nan ta dunami hopi tep riba e tereno di ‘’garnish’’ kual ta kon bo ta dekorá bo cocktail unabes e ta kla. Esey ta un area ku mi mester traha un poko mas riba dje.

-Kon bin b’a partisipa na e Curaçao Culinary Competitions?

Fabian: Esey t’e parti greit dje sektor. E shèfkòk di Baoase a inskribimi i despues bisami pa mi partisipá pasombra e ta kere hopi den mi. M’a yega di partisipá na kompetensianan di bartender mas chiki anteriormente i no a kere ku lo mi gana e Culinary Competition.

-Por ultimo tin algu ku bo ke bisa e hobennan di Kòrsou?

Fabian: Mi ke bisanan pa kere den nan mes i lucha pa tur loke nan ke logra. Si nan tin pashon pa traha den e sektor di hospitality nan ta mas ku bon biní. Banda di esaki mi ke invitanan tambe pa apoya nos tim p’asina nos ta un stap mas serka di logra medaya di oro.