CIBC FirstCaribbean hasi donashon komo apresio pa ekselente trabou

Willemstad – Junior All Star Orchestra  a risibí un tremendo ovashon riba pia serka di un públiko  grandi ku a bin huntu den Bar 27 na okashon di apertura di e edishon di 2016 di Curaçao International BlueSeas Festival. Durante di e evento ku a tuma lugá djaweps 5 di Mei, Junior All Star Orchestra a duna apertura na e di dos edishon di Curaçao International BlueSeas Festival organisá pa Fundashon Bon Intenshon den e bario pintoresko di Pietermaai.  CIBC FirstCaribbean komo un banko ku ta sostené desaroyo di hóbennan i ta tambe un orguyoso suidadano korporativo di Pietermaai a hasi un donashon na Junior All Star Orchestra.

Junior All Star Orchestra a keda lantá na 2009 i ta konsistí di músiko studiante, entre 11 pa 20 aña di edat ku ta risibí edukashon musikal den nan respektivo barionan.

E orkesta ta dirigí su mes na presentá diferente género i estilo di músika. Sr. Gedion Chandler ta dirigí e orkesta miéntras ku Sra. Wendy-Jane Gomes ta dirigí  e kantante i koristanan.  Kada presentashon ta motivá e hóbennan pa mehorá nan abilidatnan, koperá ku otro, kompartí konosementu musikal i redusí miedu di presentá riba un esenario.

Junior All Star Orchestra tabatin durante su añanan di eksistensha algun presentashon notabel, na kua e por añadí awor tambe apertura di edishon 2016 di Curaçao International BlueSeas Festival.  Aña pasá e orkesta a saka su prome CD ku kansionnan ku tin mensahe positivo dirigi riba hoben i hoben adulto. Un Lysaira Ortela, Marketing Manager di CIBC FirstCaribbean entusiasmá a bisa:

“CIBC FirstCaribbean ta kontentu di por kontribuí na e trabou balioso ku ta keda realisá pa Junior All Star Orchestra. Awenochi nan a proba atrobe ku  Kòrsou tin rason di ta orguyoso di su Junior All Star Orchestra”. “Un hende por sera su wowo i kere ku ta un di e bandanan di blues eksperenshá, ku ta aktua riba e otro stagenan durante di Curaçao International BlueSeas Festival” ela bisa.

Ortela a añadí ku CIBC FirstCaribbean ta kontentu di por hasi un donashon na e orkesta di hóbennan aki komo un apresio pa e bon trabou ku nan ta hasi i komo un enkurashamentu  pa kada un di e hóbennan sigui ekselá den loke nan ta bon den dje, esta músika.