WILLEMSTAD- Djadumingu 24 Aprel último HOPE Softball Tournament 2016 a yega na su punto kulminante i alabes ACZHON su ultimo aña. Ku sentimentu miksto nos ta partisipá esaki pa motibu ku tabata un aña ku bastante kontratiempu. No opstante esaki nos ta kontentu ku nos a yega na un final felis kaminda den un SUVEK yená ku fanátikonan ku tabatin e oportunidat pa presensiá algun wega final hopi interesante i eksitante.
Den oranan di mèrdia a tuma lugá e wega final entre MCB i SBAB. Un partido den e kategoría di COED kual MCB a sabi di gana ku 11 pa 1. Despues di esaki a sigui den e kategoría di challenger maskulino e final entre e timnan di SBAB i MCB un biaha mas. Apesar di bon hugadanan di parti di MCB nan no a logra gana e partido aki. SBAB a sabi di gana e título di kampion di e prestigioso torneo aki ku un skor di 18 pa 12. Seguidamente a pasa pa e kategoría sosial femenino kaminda e damasnan di SBAB akinan tambe a logra yega den e final kontra di e damas nan di Schoolbestuur, kual partido a finalisá 9 pa 6 na fabor di SBAB.
E ultimo partido tabata den e kategoría di sosial maskulino. Den e partido aki OMNI/Maduro & Sons/Curaçao Pharmacal a sabi di pasa riba Antilliaanse Verffabriek i sali viktorioso ku un resultado di 11 pa 1. Despues di tur esaki Dreams a sabi di entretené e públiko presente ku tabata bastante grandi. Entrega di premio a tuma lugá e mesun anochi ey. Aparte di e kampion i sub kampionnan den e 4 diferente kategoríanan di e torneo a repartí e siguiente premionan:
| Kampioen Bateo Sosial Femenino 2016 | Asila Finies, MCB |
| Kampioen Bateo Sosial Maskulino 2016 | Rayen Emers, AVF |
| Kampion Bateo Challenger Maskulino 2016 | Jeandre Pereira, Kooyman |
| Kampion Bateo COED 2016 | Gilbert Juliet, Sambil |
| Kampioen Picher Sosial Femenino 2016 | Shanelle Ernestina, SBAB |
| Kampioen Picher Sosial Maskulino 2016 | Oscar Brunken, CDM |
| Kampion Picher Challenger Maskulino 2016 | Erickson Eugenia, Kooyman |
| Kampion Picher COED 2016 | Jordan Quant, FDDK |
| Kampion Homerun Sosial Femenino 2016 | Asila Finies, MCB |
| Kampioen Homerun Sosial Maskulino 2016 | Rudney Balentien, Pinnacle |
| Kampion Homerun Challenger Maskulino 2016 | Quincy Ascencion, SBAB |
| Kampion Homerun COED 2016 | Shurendel Mujica, MCB |
| Most Valuable Player Sosial Femenino 2016 | Yurina de Caster, SBAB |
| Most Valuable Player Sosial Maskulino 2016 | Rignald Danchi, OMNI |
| Most Valuable Player Challenger Maskulino 2016 | Ryan Ilario, SBAB |
| Most Valuable Player COED 2016 | Ramsey Kirindongo, MCB |
Simbólikamente a hasi entrega di un chèk di Naf 20.000,– na VSO ZMLK Marieta Alberto, na kual tur e fondo nan rekoudá durante e torneo aki a bai pa realisá un proyekto deportivo. Tur esaki ta posibel e aña aki danki na entre otro tur ku a asistí durante 6 siman largu pa presensiá e weganan di sòfbòl slowpitch sosial i tur otro spònser nan manera MCB, Drukkerij Martina, XEROX i de Jongh Sporthuis. E Asosashon di Aktividatnan Soshal di SOAB, ACZHON i HEINEKEN kier gradisí tur timnan partisipante, boluntario nan ku a yuda di un o otro forma, sin kier lubidá Chati Constancia, Alexander Makaya i Jeffrey Martina ku tambe tabatin un aporte grandi na e organisashon di HOPE 2016.
Manera ya ta konosí esaki tabata e ultimo aña ku ACZHON tabatin e organisashon di HOPE na su enkargó. Na 2014 nos a hasi entrega di un bus na Fundashon “Amigunan di Cristo” i na 2015 nos a realisá un “Mediacentre” pa e hobennan di Stichting New Creation Curaçao ku pronto lo wòrdu inougurá. Por ultimo nos kier enfatisá ku e torneo HOPE tin su derechi di eksistensia pero tin di mantené e aspekto sosial banda di rekoudá fondo ku ta bai bèk den komunidat. Nos ta kontentu ku nos a logra haña un kompanía pa kontinuá e konsepto aki i durante di e anochi di entrega di premio nos a hasi e traspaso na Aqualectra ku ta sigui ku e reto aki. Laga nos sigui Help Others Persevere and Excel den 2017 tambe i nos ta deseá Aqualectra hopi eksito ku realisashon di esaki.
